सत्ता गठबन्धनविरुद्ध बागी उम्मेदवार बनेका कांग्रेस नेताहरू पार्टीबाट निष्कासित

नेपाली कांग्रेसले प्रतिनिधि सभा र प्रदेश सभा निर्वाचनमा सत्ता गठबन्धनका उम्मेदवारविरुद्ध बागी उम्मेदवारी दिए नेता कार्यकर्तालाई निस्कासन गर्ने निर्णय गरेको छ । कांग्रेसले बागी उम्मेदवार बनेका नेता र तिनका प्रस्तावक तथा समर्थकलाई पनि पार्टीबाट ५ वर्ष निष्कासन गर्ने निर्णय गरेको हो । 

कांग्रेसले नेकपा माओवादी केन्द्र, नेकपा एकीकृत समाजवादी, लोकतान्त्रिक समाजवादी पार्टी र राष्ट्रिय जनमोर्चासँग देशव्यापी गठबन्धन गरेको छ । कतिपय ठाउँमा गठबन्धनप्रति असन्तुष्ट कांग्रेस नेताले बागी उम्मेदवारी दिएका छन् । 

कांग्रेस केन्द्रीय कार्यालयका मुख्य सचिव कृष्णप्रसाद पौडेलले बुधवार विज्ञप्ति जारी गरी सत्तारुढ गठबन्धनको आधिकारिक उम्मेदवारविरुद्ध बागी उम्मेदवारी दिए नेता, तिनका प्रस्तावक र समर्थकलाई ५ वर्ष निष्कासन गरेको जानकारी दिएका छन् ।

निर्वाचन आयोगले उम्मेदवारी फिर्ता लिन दिएको समयभित्र उम्मेदवारी फिर्ता नलिएका नेताहरूले कांग्रेसले निष्कासन गर्ने निर्णय गरेको विज्ञप्तिमा जनाइएको छ ।