नेकपा माओवादीका केन्द्रका अध्यक्ष पुष्पकमल दाहाल ‘प्रचण्ड’ले टिकट नपाएर मन खुम्च्याउनेहरूलाई चुनावपछि अवसर नै अवसर दिने बताएका छन् । शनिवार वाम लोकतान्त्रिक गठबन्धनले विराटनगरमा आयोजना गरेको प्रदेशस्तरीय भेलालाई सम्बोधन गर्दै टिकट पाइन भनेर मन नखुच्याउन सत्ता गठबन्धनमा रहेका सबै दलका नेताहरूलाई आग्रह गरे । 

‘निर्वाचनमा टिकट पाइन भनेर मन खुम्च्याएर नबस्नुहोस्, निर्वाचनमा गठबन्धनलाई जिताउनुहोस्, चुनावपछि टिकट पाइन भनेर मन खुम्च्याएर बसेको नेता कार्यकर्ताहरूलाई अवसर नै अवसर आउने छ’, प्रचण्डले भने । उनले सत्ता गठबन्धनका सबै उम्मेदवारहरूलाई जिताउनका लागि एक ढिक्का भएर लाग्न निर्देशन समेत दिए । 

अर्को फरक प्रसंगमा प्रचण्डले नेपालमा गणतन्त्र आउँदैन भन्नेहरू अहिले ठूला–ठूला कुरा गर्दै हिँड्ने गरेको आरोप लगाए । एमाले अध्यक्ष केपी ओलीप्रति लक्षित गर्दै उनले नेपालमा संविधान आउँदैन भन्दै हिँड्ने नेता नेपालमै भएको बताए । उनले नेपालमा गणतन्त्र आउनु भनेको गोरू गाडा चढेर अमेरिका पुग्नुजस्तै हो भन्नेहरू गोरूगाडा गठबन्धन बनाएर हिँडिरहेको बताए । अघिल्लोपटकको निर्वाचनमा बनाएको वाम गठबन्धन र एकीकरणले ज्ञान मात्रै प्राप्त गरेको प्रचण्डले बताएका छन् ।