नेपाल मजदुर किसान पार्टीका अध्यक्ष नारायणमान बिजुक्छेले आसन्न प्रतिनिधि सभा र प्रदेश सभाको निर्वाचनलाई देशको परिस्थिति जाँच्ने ब्यारोमिटरको रूपमा लिएको बताएका छन् । मंगलवार प्रतिनिधि सभा र प्रदेश सभा निर्वाचनका लागि पार्टीको घोषणापत्र सार्वजनिक गर्दै उनले आगामी निर्वाचनलाई देशको परिस्थिति जाँच्ने ब्यारोमिटरको रूपमा लिएको बताएका हुन् । 

अध्यक्ष बिजुक्छेले ब्यारोमिटरको पारो तल झर्दा आँधीबेहरी आउने संकेत भएजस्तै निर्वाचनमा आफ्नो पार्टीको मत माथि भएमा क्रान्तिको सम्भावना छ भन्ने देखाउने उल्लेख गरे । उनले देशमा बिकराल समस्या देखा परिरहेको बताउँदै संसारमा तेस्रो विश्वयुद्धको सम्भावना देखिएको बताए । उनले निर्वाचनमा राष्ट्रिय र अन्तर्राष्ट्रिय परिस्थितिको विषयमा जनतालाई जानकारी गराउने बताए । 

अध्यक्ष बिजुक्छेले राष्ट्रिय परिस्थितिलाई बिगार्नेहरू को–को हुन् र अन्तर्राष्ट्रिय परिस्थितिमा ठूला दलहरूको दृष्टिकोण र आफ्नो दृष्टिकोणमा के फरक छन् भन्ने विषय लिएर जनताकोमा जाने पनि बताए । 

‘हामीले निर्वाचनलाई एउटा ब्यारोमिटरको रूपमा लिँदै आएका छौँ । त्यो भनेको ब्यारोमिटरको पारो तल झर्ना साथ आँधीबेहरी आउने संकेत भएजस्तै यदी हाम्रो पार्टीले र क्रान्तिकारी पार्टीहरूको मत सीमा धेरै माथि भयो भनेदेखि यसले क्रान्तिको सम्भावना हुन्छ भन्ने कुरा अरुअरु देशको क्रान्तिबाट पनि थाहा हुन्छ । यसकारण हामीले यसलाई हार, जित भन्दा पनि मुख्य देशको परिस्थिति के–कस्तो छ भनेर जाँच्नको निम्ति ब्यारोमिटरको रूपमा प्रयोग गर्दै आएका छौँ । अहिले हाम्रो विरोध भनेको शासक दलहरू दुईवटा खेमामा विभाजित छन् । तर, एउटै सिक्काका दुई पाटा हुन् । तिनीहरू बारम्बार सरकारमा गएको ३० वर्ष भयो । तर देशको समस्या झन्–झन् बिकराल र जटिल हुँदै गएको देखा पर्दैछ । त्यसबाहेक साम्राज्यवादीहरू र विस्तारवादीहरूको साँठगाँठअन्तर्गत दक्षिण एशिया र नेपालसमेत र संसारमा नयाँ किसिमको तेस्रो विश्वयुद्धको सम्भावना देखिँदै आएको हुनाले हामीले यो निर्वाचनलाई राष्ट्रिय र अन्तर्राष्ट्रिय परिस्थितिको विषयमा जनतालाई जानकारी गर्ने कुरामा हामी ध्यान दिन्छौँ’, अध्यक्ष बिजुक्छेले भने, ‘नेपाल मजदुर किसान पार्टीले सबभन्दा पहिले अन्तर्राष्ट्रिय परिस्थितिमा शासक दलहरूको दृष्टिकोण र हाम्रो दृष्टिकोणमा के फरक छ ? त्यसको परिणामहरू के–के होलान् ? साथसाथै राष्ट्रिय परिस्थितिलाई बिगार्नेहरू को–को हुन् ? यी सबै कुरामा हामी गाउँ–गाउँमा, जिल्ला–जिल्लामा सबै ठाउँमा जनताको सामु हामी जानेछौँ ।’