मोरङमा सोमबारबाट मात्र मतगणना हुने भएको छ । मोरङको उत्तरी क्षेत्रमा  सहजरूपमा यातायात आवतजावत नहुने र अन्य जिल्लाको बाटो भएर मतपेटिका ल्याउनुपर्ने भएकाले सोमबारबाट मात्रै मतगणना शुरू गर्न सकिने जिल्ला निर्वाचन अधिकृतको कार्यालयले बताएको छ ।

मुख्य निर्वाचन अधिकृतको कार्यालयका सूचना अधिकारी हेमराज बुढाथोकीले सबै निर्वाचन क्षेत्रको मतपेटिका संकलन भइसकेपछि एकसाथ गणना शुरू गरिने बताए । 

‘मतपेटिका गणनास्थलसम्म ल्याउन आइतबार रातीसम्मको समय लाग्छ । सोमबारबाट मात्रै मत गणना शुरू हुने सम्भावना  छ’ उनले भने । सर्वदलीय बैठक राखेपछि मतगणनाको समय टुंगो लाग्ने उनले बताए । 

मोरङका ६ वटा निर्वाचन क्षेत्रको चार ठाउँमा मतगणना हुने निर्वाचन कार्यालयले जनाएको छ ।

निर्वाचन क्षेत्र नम्बर ४, ५ र ६ को विराटनगरस्थित आदर्श माविमा गणना हुने मुख्य निर्वाचन अधिकृत दुर्गाप्रसाद ढुङ्गेलले बताए । 

मोरङ क्षेत्र नम्बर–१ को उर्लाबारी नगरपालिकामा, क्षेत्र नम्बर–२ को रतुवामाई नगरपालिकामा रहेको विश्वनाथ मन्दिरमा र क्षेत्र नम्बर–३ को मतगणना बेलबारी नगरपालिका–३ मा रहेको भगवती माध्यामिक विद्यालयमा हुने भएको छ ।

‘अहिले प्रत्येक निर्वाचन क्षेत्रमा तीन वटा गणना स्थल बनाइएको छ,’ उनले भने, ‘आवश्यकताअनुसार पछि थप हुनेछ ।’ एउटा मतगणना स्थलमा ६ जना गणकको टोली रहनेछ ।

मतगणना शुरू भएको तीन दिनभित्र प्रत्यक्षतर्फको मत परिणाम सार्वजनिक गरिसक्ने तयारी गरिएको निर्वाचन अधिकृतको कार्यालयले जनाएको छ । 

ढिलोमा ८ गतेभित्रमा प्रत्यक्षतर्फको मतपरिणाम सार्वजनिक गरिसक्ने कार्यालयको दावी छ ।

मतगणना स्थलमा बाँसको बार लगाएर सिसिटिभी जडान गरिएको छ ।