राजनीतिमा कहिलेकाही नसोचेको पनि हुँदोरहेछ । कुनै बेला एउटै पार्टीमा रहेका सहकर्मी नै प्रकारान्तरणले एकआपसमा प्रतिस्पर्धा गर्नुपर्ने अवस्था आइलाग्छ । 

मधेस केन्द्रित राजनीति गर्दै आएका महिन्द्रराय यादव र राजेन्द्र महतोको हकमा पनि त्यस्तै भएको छ । प्रतिनिधिसभाको यही मङ्सिर ४ गते सम्पन्न निर्वाचनमा तराई मधेसमा यी दुई नेता एउटै निर्वाचन क्षेत्रमा प्रतिस्पर्धीका रुपमा खडा भएका थिए ।

सद्भावना पार्टीबाट राजनीति सुरु गरेका महतो र कम्युनिष्ट पार्टीबाट अगाडि बढेका यादव कुनै समय एउटै पार्टीमा आबद्ध थिए । घटनाक्रमले उनीहरुलाई एकै निर्वाचन क्षेत्रमा उम्मेदवारी दिनुपर्ने अवस्था सिर्जना गरिदियो । त्यसमा यसपटक यादवले आफूलाई श्रेष्ठ सावित गरेर जित निकाले। तत्कालीन राष्ट्रिय जनता पार्टीका अध्यक्ष मण्डलका छ सदस्यमध्ये उनीहरु दुवै थिए । प्रकारान्तरणले सो पार्टी विभक्त भयो । जनता समाजवादी पार्टीका रुपमा नेपाली राजनीतिमा अगाडि बढिरहँदा यादवले डा बाबुराम भट्टराई र उपेन्द्र यादवलाई साथ दिए । महतो भने तराई मधेसका अर्का नेता महन्थ ठाकुरसँगै रहे ।

पछिल्लो पटक उपेन्द्र यादव नेतृत्वको जनता समाजवादी पार्टी नेपालमा विवाद सुरु भएपछि महिन्द्रले डा भट्टराईसँगै रहने निर्णय गरे। यस पटकको निर्वाचनमा डा भट्टराई नेतृत्वको नेपाल समाजवादी पार्टीले पनि नेकपा(माओवादी केन्द्र)को निर्वाचन चिह्न हसिया हथौंडालाई नै रोज्यो ।

सत्तागठबन्धमा लोकतान्त्रिक समाजवादी पार्टी पनि सहभागी थियो । त्यस पार्टीका नेता थिए महतो । यता यादव पनि नेपाल समाजवादी पार्टीका तर्फबाट भएपनि वाम–लाकतान्त्रिक गठबन्धनमा आबद्ध भए । जनतामा मत माग्न जाँदा प्राप्त हुने नजितालाई स्वीकार गर्नुको विकल्प छैन । यस्तै भयो महतो र यादवका हकमा पनि ।
    
हसिया हथौडा चिह्नमा  सर्लाही क्षेत्र नं २ बाट उम्मेदवार रहेका यादवले २३ हजार पाँच सय २९ मत प्राप्त गरी विजयी हासिल गरे । नेता महतोले २१ हजार पाँच सय १८ प्राप्त गरे । यसअघि विसं २०७४ मा भएको प्रतिनिधिसभा सदस्यको निर्वाचनमा पनि यादव सर्लाही क्षेत्र नं २ बाटै विजयी भएका थिए।

यादव २०५१ को निर्वाचन र २०५६ मा नेकपा(एमाले)बाट सर्लाहीबाटै निर्वाचित भएका थिए । विसं २०६४ को संविधानसभा सदस्यमा यादव सर्लाहीबाट निर्वाचित भएका थिए। दोस्रो संविधानसभामा पनि उनी सर्लाही क्षेत्र नं ४ बाट विजयी भएका थिए ।

उनले विसं २०५४ मा राज्यमन्त्री, २०६४ सालमा सिँचाइमन्त्री, २०६७ मा उद्योगमन्त्री र पछि सामान्य प्रशासन मन्त्रालयको जिम्मेवारी सम्हालेका थिए । कृषि र अर्थतन्त्रमा विशेष रुची रहेको यादव राजनीतिक आन्दोलनका क्रममा पटकपटक प्रहरी हिरासत र थुनामा परेका छन् ।  वसन्तपुर सर्लाही स्थायी ठेगाना रहेको उनले पिछडिएको समदाय र अल्पसङ्ख्यकको अधिकारका लागि लडिरहने नेताका रुपमा आफूलाई परिचित गराएका छन् । उनले राज्यका तर्फबाट संविधानसभा पदक प्राप्त गरेका छन् । रासस