आर्थिक वर्ष २०७९/८० को पहिलो त्रयमासमा  व्यापार घाटा घटेको तथ्यांकले देखाएको छ।  राष्ट्र बैंकका अनुसार व्यापार घाटा १३.१ प्रतिशतले घटेका हो । केही वस्तुहरुको आयातमा लगाइएको प्रतिबन्ध, प्रतितपत्र खोल्दा नगद मार्जिन राख्नुपर्नेसम्बन्धी व्यवस्था, अमेरिकी डलरको अधिमूल्यन र कर्जा प्रवाहमा संकुचन आउँदा गत वर्षको तुलनामा आयात र व्यापार घाटा घटेको राष्ट्र बैंकको भनाइ छ । यद्यपि अझै पनि मासिक औसत आयात रु.१३३ अर्ब ६७ करोड रहेको राष्ट्र बैंकले आइतबार प्रकाशित गरेको मौद्रिक नीतिको समीक्षामा उल्लेख छ । 

बैंकका अनुसार वस्तु निर्यात ३५.७ प्रतिशत र वस्तु आयात १६.२ प्रतिशतले घटेका छन् । राष्ट्र बैंकले विप्रेषण आप्रवाह सुधारोन्मुख रहेको र पहिलो त्रयमासमा विप्रेषण आप्रवाह १६.८ प्रतिशतले बढेको जानकारी दिएको छ । वैदेशिक रोजगारीमा जाने नेपालीको संख्यामा भएको वृद्धिले विप्रेषण आप्रवाहमा वृद्धि भएको हो । विप्रेषण आप्रवाह आगामी महिनाहरुमा पनि सन्तोषजनक रहने देखिएको पनि बैंकको भनाइ छ ।