विप्लव नेतृत्वको नेपाल कम्युनिष्ट पार्टी (नेकपा)ले आफ्ना पार्टीका नेता, कार्यकर्तामाथि लगाइएको मुद्दा खारेज गरी तत्काल जेलबाट रिहाई गर्न सरकारलाई दबाब दिएको छ । मंगलवार सिंहदरबारमा गृहमन्त्री बालकृष्ण खाणसँग भेट गरी नेकपाका प्रवक्ता खड्गबहादुर विश्वकर्मा ‘प्रकाण्ड’ले यस्तो दबाब दिएका हुन् । 

मुलुक निर्वाचनको परिणामसँगै नयाँ सरकार गठनको चरणमा प्रवेश गरिरहेका बेला नेकपाले भने यही सरकारले आफूहरुको माग सम्बोधन गर्नुपर्ने जिकीर गरेको छ । वर्तमान सरकारले कानूनी जटिलता हल गरेर नेकपाका नेता, कार्यकर्तामाथि लगाइएको मुद्दा खारेज गर्ने र जेलबाट रिहाई गर्ने निर्णय मन्त्रिपरिषद्बाट गरिसकेकाले त्यसलाई छिटो कार्यान्वयन गर्न सरकारलाई दबाब दिइएको हो । 

गृहमन्त्री खाणले सो समस्या समाधान गर्न सरकार इमान्दार र प्रतिबद्ध रहेको बताएका छन् । 

गृहमन्त्रीसँगको भेटपछि नेकपाका प्रवक्ता प्रकाण्डले विगतमा सरकार र नेकपाबीच भएको सहमति चाँडो कार्यान्वयन हुनुपर्ने बताए । 

‘सरकार र हामीबीच भएको सहमती छिटोभन्दा छिटो यसलाई रिजल्टमा उर्तानुस् र हामीलाई रिजल्ट दिनुस्, जनतालाई रिजल्ट दिनुस् भनेर हामीले आज भनेका छौँ । र, सरकारले के भनेको छ भने हामी यसप्रति इमान्दार र प्रतिवद्ध छौँ । यसलाई पूरा गर्ने सन्दर्भमा फेरि पनि हामी लाग्छौँ । र, लागिरहेका छौँ भन्ने सरकारको जवाफ छ । उहाँहरुको अहिले यो  विषयमा पनि थुप्रै इक्सरसाईजहरु चलिराखेका छन् । त्यसैको अभिव्यक्ति पनि होला । आज हेर्दाखेरी वार्ता सकारात्मक छ’, प्रकाण्डले भने, ‘तर, अहिले हामीले फोकस गरेको भनेको परिणाम हो । त्यो हेर्नुपर्छ । छिटो सरकारले यो परिणाम सार्वजनिक गरोस् भन्ने हाम्रो चाहना छ । पछिल्लो सहमति भइसकेपछि त्यो क्याविनेटले डिसिजन पनि गरिसकेको छ । त्यही विषयमा आज सरकार सकारात्मक ढंगले नै प्रस्तुत भएको छ । हाम्रो कुरा यही सरकारले फाईनल गर्नुपर्छ भन्ने छ । त्यो गम्भिरताका साथ सरकार प्रस्तुत हुनेछ भन्ने हाम्रो विश्वास छ ।’

केपी ओली नेतृत्वको अघिल्लो सरकारसँग तीन बुँदे सहमति गरेर नेकपा शान्ति प्रक्रियामा आएको थियो । तर, सो सहमति अझै कार्यान्वयनमा नआएको भन्दै सो पार्टीले असन्तुष्टि जनाउँदै आएको छ ।