काठमाडौं । ‘प्रेम गीत ३’बाट नेपाली फिल्म उद्योगमा भित्रिएकी अभिनेत्री क्रिष्टिना गुरुङले बिहीवार आफ्नो जन्मदिन मनाइरहेकी छिन् । 

साथीभाइसँगै फिल्मकर्मीहरू समेत सामाजिक सञ्जालमार्फत उनलाई शुभकामना दिइरहेका छन् । ‘प्रेम गीत ३’का निर्माता एवं निर्देशक सन्तोष सेनले आफ्नो फिल्मकी अभिनेत्रीलाई ‘उग्र तर दयालु’ भन्दै शुभकामना दिएका छन् । 

क्रिष्टिनालाई केक खुवाउँदै गरेको तस्वीर फेसबुकमा शेयर गर्दै सन्तोषले लेखेका छन्, ‘बलियो तर कोमल, दृढ तर मायालु, उग्र तर दयालु – एक जटिल, स्तरीय आत्मा जून प्रत्येक क्षण, प्रत्येक दिन, प्रत्येक वर्ष यस्तै रहोस् भन्ने कामना गर्दछु । जन्मदिनको हार्दिक शुभकामना ।’

असोजमा प्रदर्शनमा आएको फिल्म ‘प्रेम गीत ३’ले नेपालमा मात्र नभएर विश्व बजारमा चर्चा कमाएको थियो । फिल्ममा अभिनेत्री क्रिष्टिनाले चर्चित अभिनेता प्रदीप खड्कासँग स्क्रिन शेयर गरेकी छिन् । पहिलो फिल्म नै चर्चित भएपनि त्यो अनुसार क्रिष्टिनाले भने चर्चा पाउन नसकेको आभाष हुन्छ । उनलाई नयाँ फिल्महरूबाट अफर पुगेको बताईन्छ । यद्यपी, उनले कुनै फिल्म साइन भने गरिसकेकी छैनिन् ।