राजनीतिक दलको संख्या बढ्यो तर, सरकारको बारे कोही बोल्न सक्दैन : केपी ओली

संसदमा राजनीतिक दलको संख्या बढेको भए पनि सरकार गठनको बारेमा भने कसैले बोल्न सक्ने अवस्था नरहेको एमालेका अध्यक्ष केपी शर्मा ओलीले बताएका छन् । 

एमालेका नवनिर्वाचित सांसदहरुलाई बधाई दिन मंगलवार काठमाडौंको प्रज्ञा भवनमा आयोजित कार्यक्रमलाई सम्बोधन गर्दै उनले सरकार गठनको बारेमा अन्योलता सिर्जना भएको ओलीले बताए । 

‘संसदमा पहिले ४ वटा राष्ट्रिय पार्टी थिए । अहिले ७ वटा राष्ट्रिय पार्टी भएका छन् । पार्टी धेरै भए तर, सरकार गठनको बारेमा बोल्न पनि सक्ने अवस्था छैन’, ओलीले भने, ‘कसको सरकार, कस्तो सरकार भन्न सक्ने अवस्था छैन ।’ 

सरकार गठनको बारेमा अन्योलको अवस्था सिर्जना भएको र यस्तो हुनु लोकतन्त्रमा राम्रो नभएको उनले बताए । 

‘राजनीतिक दलको परिभाषामा नै अन्योलता उत्पन्न भएको छ । प्रतिक्रिया र लहडमा दल बन्ने, लेनदेन र स्वार्थमा दल चल्ने अवस्था छ’, ओलीले भने । 

सरकार बन्ने कुरा केही सीमित व्यक्तिको व्यक्तिगत स्वार्थमा अल्झिएको उनले बताए ।  

‘वैयक्तिक स्वार्थमा सरकार गठन अल्झिएको छ । देशको लागि दुःखद् कुरा हो । चिन्ताको विषय हो । आम चुनावपछि नयाँ सरकार बन्नु अपरिहार्य छ । किन र केका लागि सरकार बन्ने भन्ने कुराको उत्तर आउन आवश्यक छ’, उनले भने ।  

नवनिर्वाचित सांसदहरुलाई सम्बोधन गर्दै ओलीले भने, ‘सरकार देश र जनताको लागि हुनुपर्ने, सुशासन, विकास, गरिबि निवारण गर्न सरकार बन्नुपर्ने हो ।’

एमालेले के पाउँछ भन्दा पनि देश र जनताको हित हुन्छ कि हुँदैन भन्ने आधारमा सरकारको बारेमा सोच्ने उनले बताए । 

‘कतिबेला के पाउँछौँ, कसले के  पाउँछ भनेर होइन, कसले के पाउँछ भन्ने कुरालाई केन्द्र भागमा राखेर होइन, जहाँ जहाँ छौँ त्यहाँबाट देश र जनताको हितको पक्षमा उभिन्छौँ र त्यसका लागि लड्छौँ’, उनले भने, ‘अरुले ल्याइदिएको लोकतन्त्रमा विना मूल्य लाभ लिइहालौँ भनेर आएको पार्टी एमाले होइन ।’