‘दुई नम्बरी’ सुपरहिट भएपछि निर्देशक दीपेन्द्र लामाले नयाँ फिल्म निर्देशनको घोषणा गरेका छन् ।

उनको लेखन तथा निर्देशनमा ‘नाङ्गो गाउँ’ नामक फिल्म निर्माण हुने भएको हो । 

फिल्ममा अभिनेता दयाहाङ राई र अभिनेत्री मिरुना मगर फाइनल भएका छन् । दयाहाङ र मिरुनाले यसअघि यो बर्षको ब्लकबस्टर फिल्म ‘कबड्डी ४’मा अभिनय गरेका थिए ।

मनिष्मा फिल्मस् प्रा.लिको ब्यानरमा निर्माण हुने फिल्मका लागि अन्य कलाकारहरू भने छनोट हुन बाँकी छ । 

चैत महिनाबाट छायाँकन सुरु हुने फिल्ममा हिमाल शर्मा प्रस्तुतकर्ता एवं जय श्रेष्ठ निर्माता रहनेछन् ।

यो फिल्मलाई राजनीतिक कथामा प्रस्तुत गर्ने तयारी दीपेन्द्रको छ । लेखक एवं निर्देशक लामाले भने–‘ फिल्ममा मान्छेको लाचारीपन, निर्लज्जता र ढोंगप्रति व्यंग्य गरिनेछ । दर्शकले हास्य, प्रेम र कारुणिकताको आनन्द लिन पाउनेछन् ।’

‘घामपानी’, ‘गोपी’, ‘छ माया छपक्कै’ र ‘दुई नम्बरी’जस्ता फिल्म निर्देशन गरिसकेका लामाको ‘नाङ्गो गाउँ’​ पाँचौ निर्देशकीय फिल्म हुनेछ । उनको पछिल्लो फिल्म ‘दुई नम्बरी’ गत असोजमा प्रदर्शनमा आएको थियो ।