राष्ट्रिय जनमोर्चाका अध्यक्ष चित्रबहादुर केसीले चुनावमा खर्च गरेको पैसा असुल्न सबै दलले सरकारलाई समर्थन गरेको टिप्पणी गरेका छन् ।

उनले आफ्नो दल एक्दै भए पनि प्रतिपक्षमा बस्ने बताए । 

प्रतिनिधि सभामा मंगलबार प्रधानमन्त्री पुष्पकमल दाहाल 'प्रचण्ड'ले राखेको विश्वासको मत माग्ने प्रस्ताव माथिको छलफलमा भाग लिँदै केसीले प्रतिपक्षीविहीन संसदले सरकारलाई निरंकुश बनाउने बताएका हुन् । ‘सत्तापक्षमा बस्नेलाइ यहाँ भन्दा हाइसन्चो के होला ? प्रतिपक्षले समर्थन गर्ने कुरा आयो । मैले बुझेको संसदमा बलियो प्रतिपक्ष नभए सरकार निरंकुश हुन्छ’ केसीले भने, ‘अहिले प्रधानमन्त्रीलाई विश्वासको मत दिएपछि दुई वर्ष अविश्वासको प्रस्ताव राख्न पो पाइँदैन, दिएको समर्थन थुत्न त संविधानले छेकेको छ र ?’

केसीले चुनाव धेरै महँगो भएको भन्दै अहिले सत्तामा जान हानथाप गरेकाहरू खर्च उठाउन लागिपरेको टिप्पणी गरे । ‘पहिले पहिले चुनावमा जाँदा खल्तीमा पैसा बोकेर गए पुग्थ्यो, झोलमा लगेकाले पुग्थ्यो । अहिले बोरामा पैसा बोकेर चुनावमा गए, चुनावमा उडाएको खर्च उठाउन होइन सत्ताको हानथाप ?’