नेपाली कांग्रेसका नेता डा. शेखर कोइरालाले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिए पनि कांग्रेस प्रतिपक्षमै बस्ने बताएका छन् ।

बिहीवार विराटनगर विमानस्थलमा सञ्चारकर्मीसँग कुरा गर्दै नेता कोइरालाले भने, ‘विश्वासको मत दिए पनि कांग्रेसलाई प्रतिपक्षी दल भन्न मिल्छ, प्रतिपक्षमै बस्छौं । गुण र दोषको आधारमा सरकारको विरोध गर्छाैं, हामी सरकारमा जाँदैनौं ।’

कांग्रेसले प्रतिपक्षमै बस्ने र सरकारमा नजाने निर्णय गरेको बताए । ‘बैठकमा हामीबीच विश्वासको मतको पक्षमा मत हाल्ने वा विपक्षमा हाल्ने भन्ने विचार आयो । मैले कांग्रेस विभाजित मनस्थितिमा जानु हुँदैन, तटस्थ बसौं भने । मैले राखेको विचार पनि भएन,’ उनले भने ।

सरकारको हिसाबले वर्तमान सरकार नै चल्ने नेता कोइरालाले बताए । ‘अरु निर्वाचन बाँकी नै छन् । सभामुख, उपसभामुखमा हाम्रो उम्मेदवार हुन्छन्, राष्ट्रपति निर्वाचन छ, यो सबैलाई विचार गर्नुपर्छ,’ उनले भने, ‘आगामी दिनमा धेरै कुरा क्लीयर हुन्छ । कांग्रेसले राष्ट्रपतिमा हामीले आफ्नो उम्मेदवारी दिँदा सहयोग हुन्छ कि भन्ने सोच राख्छ ।'