कैलालीको टीकापुरमा भएको हत्याकाण्ड सम्बन्धी मुद्दा सर्वाेच्च अदालतमा ब्युँतिएको छ ।

जिल्ला अदालत र उच्च अदालतले दोषी ठहर गरेका रेशमलाल चौधरी सहितको मुद्दामा सर्वोच्च अदालतले झगडिया झिकाउन आदेश गरेको छ ।
 
मुद्दामा बहस गरेका अधिवक्ता दिपेन्द्र झाका अनुसार सर्वोच्च अदालतका न्यायाधीशद्वय टंकबहादुर मोक्तान र डा. मनोजकुमार शर्माको संयुक्त इजलासले आइतवार प्रत्यर्थी झिकाउने आदेश गरेको हो ।
 
टीकापुर घटनामा कैलाली जिल्ला अदालतले २०७५ फागुन २२ गते रेशमलाल चौधरी, हरिनारायण चौधरी, प्रदीप चौधरी, वीरबहादुर चौधरी र श्रवण चौधरीलाई जन्मकैदको सजाय गरेको थियो । जसमध्ये श्रवण चौधरी नाबालक थिए । सोही मुद्दामा लक्ष्मण थारुलाई जिल्ला अदालतले ३ वर्ष कैद सजाय गरेको थियो ।

तर लक्ष्मण थारुको हकमा जिल्ला अदालत दिपायलले २०७७ पुस २२ गते जिल्ला अदालतले गरेको फैसलालाई उल्ट्याएको थियो । 

लक्ष्मण थारुलाई गरिएको ३ वर्षको सजायलाई उच्च अदालतले उल्ट्याएर जन्मकैदमा परिणत गरेको थियो । जन्मकैद सजाय गरेकाहरूमध्ये नाबालक श्रवण चौधरीको जन्मकैदको सजायलाई आधा घटाएर १० वर्षमा घटाएको थियो भने रेशमलाल चौधरी, प्रदीप चौधरी र वीरबहादुर चौधरीको जन्मकैदको जिल्ला अदालतको शुरू फैसला नै सदर गरेको थियो ।

उच्च अदालतले गरेको फैसलाविरुद्ध नेपाल सरकार र सजाय ठहर भएकाहरूले पनि सर्वोच्च अदालतमा पुनरावेदन गरेका थिए ।

जिल्ला अदालत र उच्च अदालतले गरेको फरक–फरक फैसलामा पुनरावेदन हुँदा सर्वोच्च अदालतले प्रत्यर्थी झिकाउने आदेश गर्ने गर्छ । अधिवक्ता झाका अनुसार अब कानून व्यवसायीमार्फत सर्वोच्च अदालतले जिल्ला अदालत र उच्च अदालतले गरेको फैसला, मिसिल लगायतका सबै कागजात तथा कैफियतहरू झिकाउनेछन् । दुवै अदालतले गरेको फैसलालाई सर्वोच्च अदालतले परीक्षण गरी अन्तिम फैसला दिनेछ । 

सर्वोच्च अदालतलाई लागेमा उच्च अदालतले गरेको फैसला उल्टिन पनि सक्ने तथा सदर पनि हुनसक्छ । अहिले लक्ष्मण थारूबाहेक सबै जना कारागारमा छन् ।