केन्द्रीय समिति बैठकमा प्रचण्डले भने- राष्ट्रपति साझा व्यक्तित्व हुनुपर्छ

नेकपा (माओवादी केन्द्र) का अध्यक्ष तथा प्रधानमन्त्री पुष्पकमल दाहाल ‘प्रचण्ड’ ले राष्ट्रपति साझा व्यक्तित्व हुनुपर्छ भन्नेमा आफू र आफ्नो पार्टी स्पष्ट रहेको बताएका छन् । राष्ट्रपति पद संविधानको रक्षक एवंं लोकतन्त्रको पहरेदार भएकाले त्यसमा साझा व्यक्तित्व हुनुपर्ने उनको भनाइ छ ।

बिहीबार भर्चुअल माध्यमबाट बसेको माओवादी केन्द्रको केन्द्रीय समितिको बैठकलाई  सम्बोधन गर्दै उनले विगतको अभ्यासका आधारमा हेर्दा पनि मुलुकको प्रमुख व्यक्तित्व सबैको साझा हुनुपर्छ भन्नेमा आफूहरू प्रष्ट रहेको बताए ।

बैठकमा पार्टीका महासचिव देवप्रसाद गुरुङले हालै सम्पन्न स्थायी समितिको बैठकले गरेका निर्णयका बारेमा आफ्नो धारणा राखेका थिए । बैठकमा पार्टी अध्यक्ष दाहालले समसामयिक राजनीतिक विषयका साथै पार्टीका स्थायी समितिले गरेको निर्णयका बारेमा प्रष्ट पारेका थिए ।

बैठकले जनतासँगको छलफलका आधारमा आगामी दुई महिनापछि पार्टीको केन्द्रीय समितिको बैठकमा आगामी कार्यभारका बारेमा व्यापक छलफल गर्ने निर्णय बैठकले गरेको छ । पार्टीले बिहीबारमात्रै सर्कुलर पठाएर नेताहरुको कार्यविभाजनसहितको निर्णय गरेको थियो ।