आन्दोलनको मौका छोपेर मोबाइल पसलमा चोरी, यसरी चोरिए मोबाइल [भिडियोसहित]

काठमाडौंमा यातायात व्यवासायीहरूको आन्दोलनका क्रममा बसपार्क क्षेत्रमा लुटपाट भएको छ । सोमबार दिउँसो बसपार्क क्षेत्रमा सटरहरू फुटाएर मोबाइल पसल लुटिएको व्यवसायी अर्जुन चालिसेले बताए ।

‘आन्दोलनकारीहरूले मेरो पसलको सटर नै फुटाएर मोबाइल चोरी गरेका छन् । हामीसँग भएको सीसीटीभी फुटेजहरूमा चोर्ने उद्देश्यले पसेर सामान लगेको देखिन्छ ।’ व्यवसायी चालिसेले लोकान्तरसँग भने । 

आन्दोलनमा केही अराजक व्यक्तिहरूले आफ्नो ७ करोड भन्दा धेरैको मोबाइल लुटेर लगेको उनको भनाई छ । आफूहरूले क्षतिपूर्ति पाउनु पर्ने र मोबाइल चोरी गर्नेहरूललाई प्रहरी पक्राउ गरेर कारबाही गर्नुपर्ने उनले बताए ।
सोमबार १ सय भन्दा कम आन्दोलनकारीलाई प्रहरी व्यवस्थापन गर्न नसकेको व्यवसायी गोविन्द सुवेदीको आरोप छ ।

‘दिउँसो १२ बजे १ सय मात्रै आन्दोलनकारीहरू थिए । तर प्रहरीले त्यसलाई व्यवस्थापन गर्न नसक्दा चोरीसम्मको अवस्थामा आइपुगेको हो ।

'गृह प्रशासनले वास्ता नगर्दा यस्तो अवस्था आएको हो । हिजो यहाँ धेरै आन्दोलनकारी थिएनन्,’ सुवेदीले लोकान्तरसँग भने । 

व्यवसायीहरूले सोमबार नै लुटपाटमा संलग्नलाई समाएर प्रहरीलाई बुझाएका थिए ।

प्रहरी परिसर काठमाडौंका प्रमुख प्रहरी वरिष्ठ उपरीक्षक (एसएसपी) दानबहादुर कार्कीका अनुसार चोरी गर्ने ९ जना व्यक्ति पक्राउ परेका छन् । अन्यको खोजी भइरहेको छ ।

आज पनि आन्दोनकारीले बस चल्न दिएका छैनन् । नेपाल मोबाइल व्यवसायी महासंघले पनि चोरी भएका सामानहरूको क्षतिपूर्ति पाउनु पर्ने भन्दै आन्दोलनको तयारी गरेको छ ।

हेर्नुहोस्, भिडियो :