५ दिने औद्योगिक प्रदर्शनी शुरू, साना उद्यमी कर्जालाई सजीकरण गर्ने प्रधानमन्त्रीको प्रतिबद्धता

राजधानीको भृकुटीमण्डमा ५ दिने औद्योगिक प्रदर्शनी शुरु भएको छ । प्रधानमन्त्री पुष्पकमल दाहाल 'प्रचण्ड'ले मंगलबार मेलाको औपचारिक उद्घाटन गरेका छन् ।

१६ औं अन्तर्राष्ट्रिय औद्योगिक व्यापार मेला तथा घरेलु उद्योग महोत्सव र छैठौं प्राङगारिक कृषि मेला–२०७९ नाम दिइएको मेला आगामी ६ फागुनसम्म चल्ने भएको छ ।  

स्वदेशी उत्पादनको प्रवर्धन गर्ने उद्देश्यले मेला आयोजना भएको छ । मेलामा  ६ लाखभन्दा बढी लघु, घरेलु तथा साना उद्योगहरू र कृषि व्यवसायमा संलग्न उद्यमीहरूको प्रतिनिधिमूलक संस्थाको सहभागि हुने छ ।

‘नेपाली वस्तु प्रयोग गरौं, नेपाली भएकोमा गर्व गरौं भन्ने मुल नारासहित ‘मिहिनेत, सिर्जना, उत्पादन र वस्तु मैरै नेपालको’ भन्ने सहायक नारासहित मेला आयोजना भएको छ ।

लामो समयदेखिको अस्थिरता तथा महामारीका कारणले गर्दा बैंकिङ क्षेत्रमा देखिएको तरलता अभावले सिर्जना गरेको लघु घरेलु तथा साना उद्योगमा थप लगानी गर्ने पूँजीको अभावलाई सरकारले समाधान गर्न मेलामार्फत पहल हुने आयोजक संस्थाले बताएको छ ।

वित्तीय अस्थिरताका कारण लघु घरेलु र साना उद्योगीले उपभोग गरेको कर्जामा अत्यधिक ब्याज बृद्धि हुन गई उद्योगीहरूमा परेको समस्या तत्काल समाधान गर्न सरकारले गर्नुपर्ने, लघु घरेलु तथा साना उद्योगीले उपभोग गरेको कर्जालाई नवीकरण गरी थप पुनकर्जा प्राप्त गर्ने वातावरण बनाउनुपर्ने उद्यमीको मागलाई सरकारले सम्बोधन गर्ने प्रधानमन्त्री पुष्पकमल दाहाल प्रचण्डले बताएका छन् । 

मंगलवार मेलाको उद्घाटन गर्ने प्रधानमन्त्री प्रचण्डले लघु घरेलु तथा साना उद्योग दर्ता र नवीकरण गर्दा स्थानीय तहको वडा, पालिका, प्रदेश र केन्द्रमा कम्पनी रजिष्टार समेतमा कागजात र राजस्व बुझाउनुपर्ने झन्झटिलो व्यवस्था हटाउन सहजीकरण गर्ने बताए ।

उनले उत्पादनमूलक लघु घरेलु तथा साना उद्योगका लागि प्रदान गरिने सहुलियतपूर्ण कर्जाहरूलाई पुनःपरिभाषित गर्ने पनि बताए ।

सम्भावनायुक्त उद्योगहरूको प्रोत्साहनमा विशेष कार्यक्रमको अगाडि सार्ने बताएका छन् ।

सम्भावनायुक्त लघु घरेलु तथा साना उद्योगलाई निश्चित समयका लागि सबैखाले करबाट मुक्त गरी स्वदेशी उत्पादनको अभिबृद्धि गर्ने,  लघु उद्यमको पुँजी, प्रविधि र पहुँचका लागि विशेष कार्यक्रम आवश्यक भएको पनि प्रण्डले बताएका छन् ।

संघीय सरकारले स्थानीय तहलाई सीधै दिने अनुदान थप सहज, औद्योगिक वातावरण निर्माण, तीनै तहको सरकारको सहभागितामा प्रगतिशील औद्योगिक नीति सहितमा सहजीकरण गर्ने पनि प्रधानमन्त्री प्रचण्डको भनाइ छ ।

महिला, युवा र कृषि उद्यमीका लागि सहुलियतपूर्ण कर्जाको अवस्थालाई अझै प्रभावकारी बनाउने, कृषिलाई व्यवसायिक र औद्योकिरण गरी देशको अर्थतन्त्रलाई आत्मनिर्भर बनाउने दिशामा सरकारले विशेष प्राथमिकता दिन सरकार तयार रहेको प्रधानमन्त्रीको भनाइ  छ।

आत्मनिर्भर अर्थतन्त्र निर्माण गर्न गुणस्तरीय वस्तुको उत्पादन, निर्यात बढाउने र आयात प्रतिस्थापन गर्नेसहितका विषयमा राज्यले ध्यान दिने प्रधानमन्त्रीले सम्बोधनमार्फत उल्लेख गरेका छन् ।

स्वरोजगारी र रोजगारी सिर्जनाका लागि स्वदेशी कच्चा पदाार्थमा आधारीत स्वदेशी उत्पादनमूलक र उद्योगहरूलाई दक्ष जनशक्ति उत्पादनको लागि कार्यस्थलमा तालिमको व्यवस्था सरकारले मिलाउने भएको छ ।

पूँजी पहुँचमा अहिले पनि लघु, घरेलु तथा साना उद्योगीहरू ठूलो मारमा छन् । यसका लागि राज्यले विशेष आर्थिक प्याकेज सहुलियतपूर्ण कर्जाको व्यवस्था मिलाउने पनि प्रधानमन्त्री प्रचण्डले बताए ।

लघु, घरेलु तथा साना उद्योगद्धारा उत्पादित वस्तुहरूलाई केन्द्रीय स्तरमा अन्तर्राष्ट्रियस्तरको बिक्री कक्षको स्थापनाका लागि पूर्वाधार निर्माणमा आवश्यक पर्ने सबै प्रकारका सहयोग र सहुलियत राज्यले मिलाउने भएको छ ।

साथै देशमा महिलाले सञ्चालन गरेका लघु, घरेलु तथा साना उद्योगले ठूलो संख्यामा स्वरोजगारी भएका र रोजगारी सिर्जना गरेका उद्योगलाई राज्यले प्रवर्द्धन गर्ने प्रतिबद्धता पनि प्रचण्डले व्यक्त गरेका छन् ।