माओवादी बैठकमा प्रचण्डको ब्रिफिङ –ओलीको मान्छे राष्ट्रपति बनाए संकटमा परिन्छ

नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमाले समर्थित व्यक्तिलाई राष्ट्रपतिमा समर्थन गर्न नसकिने बताएका छन् । पुस १० पछिको दुई महिनाको सहकार्य त्यति सहज नभएको उनले बताए । 

पार्टी केन्द्रीय कार्यालय कोटेश्वर पेरिसडाँडामा सोमबार बसेको पदाधिकारी बैठकमा प्रचण्डले एमालेको क्याडरलाई राष्ट्रपति स्वीकार गर्न नसकिने बताएका हुन् । ‘एमाले र ओलीजीसँग त्यति सजिलो छैन । ओलीकै मान्छे राष्ट्रपति बनायो भने झन संकटमा परिन्छ’ प्रचण्डको भनाइ उद्धृत गर्दै एक पदाधिकारीले लोकान्तरसँग भने, ‘राष्ट्रपति राष्ट्रिय सहमतिको साझा उम्मेदवार बनाउनु पर्छ भन्ने मेरो बुझाइ छ ।’

एमाले अध्यक्ष ओलीले हार्डकोर कार्यकर्ता भन्दापनि अन्य दलको नेता या स्वतन्त्र व्यक्तिलाई पनि अगाडि सार्ने सम्भावना रहेको प्रचण्डले बताए । ‘माधव नेपाल, बाबुराम भट्टराई देखि झलनाथ खनालसम्मलाई अगाडि सार्ने सम्भावना रहन्छ । ओलीकै मान्छेलाई स्वीकार गर्यो भने त झन दुख पाइन्छ । त्यसैले राष्ट्रिय सहमतिको व्यक्ति खोज्ने तिर लागौँ’ प्रचण्डले भनेका थिए । 

शान्ति प्रक्रियाका अधुरा काम पूरा गर्नुपर्ने भन्दै यस सवालमा कांग्रेससँग सहज हुने उनले बताएका थिए । माओवादी बैठकले राष्ट्रपतिमा कसलाई समर्थन गर्ने भन्ने निर्णयको जिम्मा प्रचण्डलाई दिएको छ । बैठक बस्न सम्भव नहुने भन्दै प्रचण्डले त्यो अधिकार आफूलाई दिन आग्रह गरेका थिए । 

कांग्रेससँग पनि छलफल चलिरहेकाले उसँगको सहकार्यलाई नकार्न नसकिने प्रचण्डले बताएका थिए । फागुन २५ गते हुने राष्ट्रपति निर्वाचनका लागि फागुन १३ गते उम्मेदवार मनोनयनको कार्यतालिका छ । 

क्वात्राले कुनै दवाव दिएका थिएनन्
बैठकमा एक पदाधिकारीको प्रश्नको जवाफमा प्रचण्डले हालै नेपाल भ्रमण गरेका भारतीय विदेश सचिव विनयमोहन क्वात्राले राष्ट्रपति निर्वाचनबारे कुनै दवाव नदिएको बताए । 

‘बाहिर आएजस्तो उनले राष्ट्रपति निर्वाचनबारे कुनै दवाव दिएका होइनन् । बरु, भारत भ्रमणमा कहिले आउनु हुन्छ भनेर सोधेका थिए । मैले राष्ट्रपतिको चुनाव अघि त सम्भव हुँदैन भनेँ’ प्रचण्डको भनाइ उद्धृत गर्दै ती सदस्यले भने । 
नेपाली नेताहरूसँगको भेटमा क्वात्राले राष्ट्रपतिमा गैर कम्युनिस्ट व्यक्ति होस भन्ने भारतको चासो व्यक्त गरेका बाहिर चर्चा भएको थियो ।