लामो समयपछि पानी परेपछि इलामका किसान खुसी भएका छन् ।

असोजको पहिलो हप्तादेखि पानी नपरेको इलाममा बुधबार साँझदेखि रातिसम्म इलाममा पानी परेको थियो।

पानी परेपछि अलैँची र चिया, आलु, तोरी तथा तरकारीलगायत बालीलाई राहत भएको छ। किसान सन्तोष राईले पानी परेपछि अब तरकारी खेतीमा चिस्यान हुन पुगेकोमा खुसी व्यक्त गरे। 

यो याममा पानी परेपछि फागुन अन्तिमदेखि नै चिया पलाउने र तोरी, गहुँलगायत बाली पनि सप्रिने उनले बताए।

लामो समयसम्म वर्षा नहुँदा जमिन सुक्खा भएकाले किसानले बारी खनजोत गर्नसमेत पाएका थिएनन् ।

अब भने सहज रूपमा खनजोत गर्न पाइने यहाँका किसानको भनाइ छ।

पानी नपरेपछि खोलानाला सुक्दै गएका थिए । खोला खोल्सामा पानी नहुँदा सिँचाइमा समेत समस्या हुँदै आएको थियो । अब भने केही समयका लागि पाइप लगाएर सिँचाइमा खट्नु नपर्ने किसानको भनाइ थियो । 

पानीले घाँससमेत छिटो पलाउने भएकाले यहाँका पशुपालक किसानसमेत उत्साहित भएका छन् । तराईबाट सुक्खा पराल ल्याउनुपर्ने बाध्यता रहेकामा अहिले परेको पानीले समयमै घाँससमेत पलाउने उनीहरूको विश्वास छ। 

सुक्खा नलागे वैशाखदेखि बर्खे घाँस काट्न पाइने अनुमान गरिएको छ ।