स्वदेशमा भएको क्रिकेट प्रतियोगितामा नेपाली समर्थकको मन जितेका क्रिकेटर सन्दीप लामिछाने विदेश जाने नेपाली टीमबाट ‘आउट’ भएका छन् ।

उनलाई धरौटीमा छाड्ने आदेश दिँदा उच्च अदालतले विदेश जान नपाउने शर्त राखेको छ । नेपाल क्रिकेट संघ (क्यान) ले यूएई जाने खेलाडीको सूचीमा सन्दीप लामिछानेको नाम हटाएको छ ।

क्यानको सूचीमा प्रतिस जिसीको नाम थपिएको छ । अदालतको आदेशका कारण सन्दीपको नाम समावेश गरिएको छैन ।

टीममा आरिफ शेखको पुनरागमन भएको छ । मिडिल अर्डर ब्याट्सम्यान आरिफ शेख स्कटल्यान्ड र नामिबियासँगको खेलमा टोलीमा थिएनन् ।

आईसीसी क्रिकेट विश्वकप लिग टुअन्तर्गत नेपालले फागुन १५–२२ गतेसम्म यूएई र पपुवा न्युगिनीसँग खेल्ने कार्यतालिका छ । नेपाली टोली फागुन १३ गते यूएई जाँदैछ ।

बलात्कार आरोप लागेका स्पिनर लामिछाने विदेश जान पाउने छैनन् । मंगलवार सम्पन्न नामिबिया र स्कटल्यान्डसँगको त्रिकोणात्मक ओडिआई सिरिजमा सन्दीपले ४ खेलमा १३ विकेट लिएका थिए । सन्दीपले पहिलो खेलमा नामिबियाविरुद्ध १० ओभरमा ६६ रन खर्चेर ३ विकेट लिएका थिए ।

दोस्रो खेलमा स्कटल्यान्डविरुद्ध १० ओभरमा २७ रन खर्चेर ३ विकेट लिएका थिए । तेस्रो खेलमा सन्दीपले नामिबियाविरुद्ध १० ओभरमा ४६ रन खर्चेर ३ विकेट लिएका थिए । स्कटल्यान्डविरुद्ध १० ओभरमा ४५ रन खर्चेर ४ विकेट लिएका थिए ।