कांग्रेस उपसभापति पूर्णबहादुर खड्काले राष्ट्रपति चुनावकेन्द्रित ४ दलीय छलफल सकारात्मक भएको बताएका छन् ।

छलफलपछि लोकान्तरसँग कुराकानी गर्दै खड्काले राष्ट्रपतिमा कांग्रेस र एकीकृत समाजवादीको दाबी रहेको बताए।  

‘राष्ट्रपतिमा आ–आफ्नो दाबी छ । कांग्रेस र नेकपा समाजवादीको मुख्य दाबी हो । तर हामीले विभिन्न विकल्पमा छलफल गरिरहेका छौं । को किन राष्ट्रपति हुने भन्ने औचित्य र आवश्यकताको आधारमा आ–आफ्नो तर्क राख्ने काम भएको छ’, खड्काले भने, ‘तर छलफल सकारात्मक भएको छ । आजै साँझ ५ बजे बसेर हामी एउटा टुंगोमा पुग्छौं । हामी एउटा सहमतिमा पुग्ने सम्भावना नजिक छौं ।’ 

विभिन्न विकल्पमा कुरा भएको भन्दै उनले राष्ट्रपतिमा कांग्रेसमा सहमति हुने जनाउ पनि दिए ।

‘ठ्याक्कै भन्न मिल्ने गरी सहमति भयो भएको छैन । तर हामी विभिन्न विकल्पबारे आन्तरिक छलफल पनि गर्दैछौं’ खड्काले भने, ‘आन्तरिक छलफलपछि ५ बजे पुनः चार दलको बैठक बसेर टुंगोमा पुग्छौं ।’  छलफलपछि कांग्रेस महामन्त्री गगन थापाले पनि ५ बजे बस्न चार दलको बैठकले सहमतिमा एउटै निर्णयमा पुग्ने बताएका थिए । 

राष्ट्रपति चुनावका लागि उम्मेदवारी मनोनयन गर्ने एक दिन अघि कांग्रेस, माओवादी, नेकपा एकीकृत समाजवादी र जसपाबीच छलफल भएको हो । 

राष्ट्रपतिमा कांग्रेस र नेकपा समाजवादीले दाबी गरेको छ । कांग्रेसबाट अहिलेसम्म रामचन्द्र पौडेल र कृष्णप्रसाद सिटौलालाई अगाडि सारिएको छ । समाजवादीबाट माधव कुमार नेपाललाई प्रस्ताव गरिएको छ । यही गठबन्धन कायम हुँदा कांग्रेसले राष्ट्रपतिमा दबाब बढाएर आफ्नो नेता जिताउने अवस्था देखिएको छ । यस्तोमा माओवादी र समाजवादीले पनि माने कांग्रेसले पौडेललाई उम्मेदवार बनाउन सक्ने देखिएको छ । 

तर माओवादी र समाजवादी दुवैले पौडेल र सिटौला दुवैलाई हुन्न भन्दै देउवाको नाममा सहमति गरौं भन्ने प्रस्ताव पनि राख्न सकिने देखिन्छ ।

किनकि देउवालाई राष्ट्रपति बनाउँदा प्रचण्ड निर्धक्क प्रधानमन्त्री हुन पाउँछन् । देउवा नै अघि बढ्ने स्थितिमा नेपालले पनि दाबी नगर्ने बुझिएको छ। कांग्रेसभित्रैको ठूलो हिस्सा पनि देउवा राष्ट्रपति भएर सक्रिय राजनीतिबाट बाहिरिएको देख्न चाहन्छ। 

एमालेले समर्थन फिर्ता लिएमात्रै नयाँ गठबन्धन

राष्ट्रपतिको चुनाव टुंगिएपछि बल्ल सरकारबारे छलफल हुन सक्ने खड्का बताउँछन् ।

‘राष्ट्रपति र उपराष्ट्रपतिको टुंगो लागेपछि बल्ल सरकारमा कुरा जान्छ । अनि अर्को गठबन्धनको कुरा होला । गठबन्धन नटुटी अहिले नै कसलाई चुनावी प्रधानमन्त्री बनाउने बन्ने प्रस्ताव गरियो भन्ने होइन । भविष्यको कुरा एउटा होला । परिस्थिति आएपछि शक्ति बाँडफाँटको कुरा पनि आउला । तर अहिले हामी राष्ट्रपतिमै केन्द्रित भएर छलफल गरिरहेका छौं,’ खड्काले भने ।

खड्काले राष्ट्रपतिमा आफूहरूबीच सहमति जुटे एमालेलाई सरकारबाट फिर्ता हुन नैतिक दबाब पुग्ने संकेत गरे ।

‘पुरानो गठबन्धन जारी छ । यो विषय टुंगो लागिसकेपछि अरु विषय अगाडि बढ्लान् । माओवादी अहिलेसम्म एमालेसँगको गठबन्धनमा कायम छ । राप्रपा र राष्ट्रिय स्वतन्त्र पार्टीसहितका गठबन्धन नभत्की अर्को गठबन्धन बन्यो भन्दा दुनियाँ हाँस्छ’, खड्काले थपे,‘हामीले गठबन्धन भन्ने तर एमाले, राप्रपा, घण्टी एक ठाउँमा बसे सरकार छोडेनन् भने के गर्ने ? गठबन्धन बन्न एमालेले सरकारलाई दिएको समर्थन फिर्ता लिनुपर्छ । तर राष्ट्रपति र उपराष्ट्रपतिको चुनावमा हामी अहिले छलफलमा रहेका दलहरू एक ठाउँमा उभिँदा वातावरण बन्छ ।’