अमेरिकाका पूर्व राष्ट्रपति डोनल्ड ट्रम्पले आफूलाई छिट्टै पक्राउ गरिन सक्ने भनी केही दिनअघि बयान दिएपछि उनी पक्राउ परेका झूटा तस्वीरहरू भाइरल भए । 

प्रहरी अधिकारीहरूले ट्रम्पलाई घेरेर पक्राउ गरेका तस्वीर इन्टरनेटभरि छाए । ती तस्वीर कृत्रिम बौद्धिकता (एआई)ले बनाएका थिए । 

यस्ता झूटा तस्वीर इन्टरनेटमा छ्यापछ्याप्ती हुँदा धेरै मानिसले यसलाई सत्य ठाने । हुन पनि तस्वीरहरू वास्तविक घटनालाई नै खिचिएको जस्तो देखिन्छन् । 

तर ती तस्वीरहरू एआई इन्जिन मिडजर्नी भी५ ले बनाएको हो । 

ध्यान दिएर हेर्ने हो भने तस्वीरमा ट्रम्पको हात अनौठो किसिमको देखिन्छ । अरू कुरा पनि अलि विचित्रको देखिन्छ तर झट्ट हेर्दा यस्ता कुरा थाहै हुन्न । 

अनि चीनका राष्ट्रपति सी चिनपिङले मस्को भ्रमण गर्दा रुसका राष्ट्रपति भ्लादिमिर पुटिनले उनलाई घुँडा टेकेर अभिवादन गरेको तस्वीर पनि सार्वजनिक भयो । 

धेरै मान्छेले त्यो साँचो तस्वीर भन्ठाने । विशेषगरी युक्रेनको सामाजिक सञ्जालमा त्यो तस्वीर भाइरल बन्यो । तर त्यो पनि एआईले बनाएको झूटो तस्वीर थियो । 

एआईले भयंकर प्रगति गरी यथार्थपरक जस्तो देखिने तस्वीरहरू बनाइदिन थालेको छ । कुनै विशेष दक्षता नभएको मानिसले पनि केही मिनेटभित्रै एआईको सहायताबाट यस्तो तस्वीर बनाइदिन्छ । यसबाट झूटो सूचनाको प्रवाह व्यापक बढेको छ । 

त्यसैले यस्ता तस्वीरको प्रकाशन तथा प्रसारणलाई नियमन गर्नुपर्ने माग विज्ञहरूले गर्न थालेका छन् ।