नेकपा एमालेका अध्यक्ष केपी शर्मा ओलीले नेता कार्यकर्ताले भाषणभन्दा व्यवहार र आचरण असल बनाउनुपर्ने निर्देशन दिएका छन् ।

पार्टीले सञ्चालन गरेको मिसन ग्रासरुट अभियानअन्तर्गत बुटवलमा भएको अगुवा कार्यकर्ता भेलालाई सम्बोधन गर्दै ओलीले अहिले जनताले भाषण, विचार सुन्नभन्दा व्यवहार र आचरण हेर्ने भन्दै जनताको मन जित्ने गरी जनतामैत्री असल व्यवहार र आचरण देखाउन निर्देशन दिए । 

ओलीले माओवादी केन्द्र र नेकपा एकीकृत समाजवादीका नेताहरू खराब भए पनि कार्यकर्ताहरू असल रहेकाले दुवै पार्टीका कार्यकर्तालाई पार्टीमा भित्र्याउनुपर्ने बताए। 

‘माओवादी केन्द्र र नेकपा एस भन्ने पार्टीका नेताहरू कम्युनिष्टका नाममा कांग्रेसको पछि लागेर कम्युनिष्ट शक्तिलाई सिध्याउन लागेका छन्’,ओलीले भने,‘तर कार्यकर्ताहरू असल छन्, उनीहरूलाई नेतृत्वको भ्रमबाट मुक्त गरेर एमालेमा ल्याई विनाभेदभाव उचित जिम्मेवारी दिएर पार्टीलाई बलियो बनाउनुपर्छ ।’

माओवादी केन्द्रका अध्यक्ष प्रचण्ड तत्कालीन राजा ज्ञानेन्द्रसँग मिलेर दलहरूलाई सिध्याउन लागिपरेको तर ज्ञानेन्द्रले 'कु' गरेपछि बल्ल गणतन्त्रका कुरा गर्न थालेको टिप्पणी गरे ।

एकीकृत समाजवादीका अध्यक्ष माधव नेपाल आफ्नै पार्टीको सरकार ढालेर कांग्रेसलाई सत्ता सुम्पिन अदालत धाउनेदेखि पार्टी विभाजनमा लागेको उनको आरोप थियो।