बालुवाटारमा बसेको सत्ता साझेदार दलको बैठक मन्त्रीहरुको नाम फाइनल गर्न असफल बनेको छ । बिहीबार राति अबेरसम्म बसेको बैठकमा दलहरुले पाउने मन्त्रालयबारे पूर्ण सहमति नजुटेपछि बिहीबार हुने भनिएको मन्त्रिपरिषद् विस्तारको भाका त्यसै गुज्रिएको छ । 
अब शुक्रबार बिहान थप छलफल गरेर सहमतिमा पुग्न प्रयास गरिने नेताहरुले बताएका छन् । 

प्रधानमन्त्री पुष्पकमल दाहाल प्रचण्ड बिहीबार अपरान्ह काठमाडौं चितवन फर्किएपछि मन्त्रिपरिषद्को विस्तारको निर्णायक छलफलमा जुटेका थिए । कांग्रेस, माओवादी, नेकपा एस, जसपालसँग कहिले संयुक्त त कहिले छुट्टाछुट्टै छलफल गरे पनि अबेरसम्मै सहमति जुट्न नसकेको हो । मन्त्रालयको संख्यामा मोटामोटी सहमति जुटे पनि केही मन्त्रालयमा अलगअलग दलको दाबी भएपछि कुरा मिल्न नसकेको बालुवाटार स्रोतको भनाई छ । 

राष्ट्रपतिमा माओवादीले कांग्रेस उम्मेदवारलाई समर्थन गरेपछि १५ फागुनमा एमाले सरकारबाट फिर्ता भएको थियो । त्यसयताको एक महिनामा १६ वटा मन्त्रालयको जिम्मा प्रधानमन्त्री प्रचण्डसँग रहँदै आएको छ ।