जनता समाजवादी पार्टी नेपालका सांसद प्रदीप यादवले बारा र पर्सा जिल्लाको सिमानामा पर्ने सिर्सिया नदी प्रदुषण गर्ने उद्योगहरूलाई कारबाही गर्न माग गरेका छन्। 

बिहीवार प्रतिनिधि सभा बैठकमा सांसद यादवले सिर्सिया नदी किनारामा विभिन्न उद्योगहरू सञ्चालनमा रहेका र ती उद्योगबाट निस्किने रासायनिक पानी सीधै नदीमा मिसाउँदा नदी प्रदूषित भएको बताए।

उनले नदी प्रदूषित हुँदा मानिस र पशुचौपायालाई समेत छालासम्बन्धी विभिन्न रोगको संक्रमण भएको भन्दै त्यसतर्फ सरकारको ध्यानाकर्षण गराए।

नियम मिचेर काम गर्ने उद्योगीहरूलाई अविलम्ब कारबाही गर्न उनले सरकारसँग माग गरे। 

‘यी उद्योगहरूबाट निस्किने रसायनयुक्त पानी प्रशोधन नगरी सीधै नदीमा फाल्ने गर्दछन् । यसरी खेलवाड गर्ने उद्योगलाई अहिलेसम्म कारबाही हुँदैन । मेरै जिल्लाको उद्योगमन्त्री बन्नुभएको छ, उहाँहरूलाई यो कुराको बढी अवगत छ । सरकारको आँखामा पट्टी बाँधिएको छ । सरकारलाई थाहा छ उद्योगीहरू बदमासी गरिरहेको छ । उद्योगीहरू नियम मिचिरहेको छ । नियमबाहिर प्रशोधन नगरी पानी नदीमा फालिरहेको छ । तर सरकार मूकदर्शक भएको छ । त्यहाँको सीडीओले भन्छ, हामीले आदेश पाए २४ घण्टामा नियन्त्रण गर्छौ । तर आदेशकर्ता को हो ? कहाँ गएको छ ?’ 

सिर्सिया नदीको छेउमा छाला, डिस्टिलरी, आइरन, टेस्टाइल, घिउ, साबुन, कार्टुन, कागज, सलाईलगायत उद्योग छन्।