सन्दीप लामिछानेको मुद्दा : प्रतिवेदक डाक्टर र बयानकर्तालाई झिकाउन आदेश

काठमाडौं जिल्ला अदालतले क्रिकेटर सन्दीप लामिछानेविरुद्धको बलात्कार मुद्दामा पीडितको स्वास्थ्य परीक्षण गरेका प्रसुती गृहका डाक्टर र प्रतिवादीतर्फका बयानकर्तालाई झिकाउन आदेश दिएको छ ।

अन्तिम सुनुवाइ गर्नुअघि काठमाडौं जिल्ला अदालतका न्यायाधीश शंकरराज बरालले प्रतिवेदक डाक्टरलाई झिकाउने आदेश आइतवार दिएका हुन् ।

अन्तिम सुनुवाइ शुरू नभएको र प्रतिवेदन लेख्ने डाक्टर तथा प्रतिवादीतर्फका बयानकर्तालाई झिकाउने आदेश भएको जानकारी जाहेरवालाको तर्फबाट बहस गर्दै आएकी वरिष्ठ अधिवक्ता प्रा.डा. शशी अधिकारीले लोकान्तरलाई दिइन् । 

प्रतिवेदक डा. यादवलाई नै झिकाउन यसअघि पनि अदालतले आदेश गरेको थियो । तर, आफू सुत्केरी भएको हुनाले चैत ६ गतेपछि मात्र 'फ्री' हुन सक्ने भन्ने पत्र उनले अदालतमा पठाएकी थिइन् ।

त्यसपछि प्रसुती गृहले उनको ठाउँमा परीक्षण गर्ने टोलीमध्येकै डा. अनामिका झालाई बकपत्रका लागि अदालतमा पठाएको थियो ।

सुनुवाइ शुरू हुनुअघि न्यायाधीश बराल आफैंले मिसिल अध्ययन गर्दा प्रतिवेदक डा . यादव अदालतमा उपस्थित हुनुपर्नेमा नभएकाले पछि त्यही विषयलाई लिएर 'इस्यु' हुन सक्ने भन्दै यादवलाई नै झिकाउने आदेश गरेका हुन् ।

डाक्टर मनिषा यादवसहित तीनजनाको टोलीले १२ पेजको स्वास्थ्य परीक्षण प्रतिवेदन बुझाएको थियो । 

स्वास्थ्य प्रतिवेदनमा हस्ताक्षर गरेकै डाक्टरलाई झिकाउने आदेश भएको अधिवक्ता अधिकारीले जानकारी दिइन् । प्रतिवादीको तर्फबाट बयान गरेका साहब आलम र अनिल श्रेष्ठलाई पनि झिकाइएको छ । 

लामिछानेमाथि नबालिक बलात्कारको आरोप छ । काठमाडौं जिल्ला अदालतमा मुद्दा विचाराधीन रहेकै समयमा पाटन उच्च अदालतले लामिछानेलाई धरौटीमा रिहा गरेको थियो ।

पछि सर्वोच्चले लामिछानेलाई विदेशमा खेल्न जान समेत अनुमति दिएको थियो ।