नक्कली भुटानी शरणार्थी प्रकरणमा पक्राउ परेका पूर्व गृहमन्त्री बालकृष्ण खाँणको बयान मंगलवार बिहान साढे ११ बजेदेखि जिल्ला सरकारी वकिलको कार्यालय काठमाडौंमा शुरू भएको थियो । बिहानदेखि शुरू भएको बयान राति ८ बज्नै लाग्दासम्म जारी छ ।

बयानका लागि दोस्रो दिन मंगलवार जिल्ला सरकारी वकिल कार्यालय काठमाडौंमा झण्डै ८ घण्टादेखि उनको बयान जारी छ । बिहान साढे ११ बजेदेखि शुरू भएको उनको बयान राति ८ बज्नै लाग्दासम्म चलिरहेको कार्यालयले जनाएको छ । 
 
कार्यालयका एक सरकारी वकिलका अनुसार खाँणले हरेक प्रश्नमा सोचेर र समय लगाएर मात्रै जवाफ दिइरहेका छन् । खाँणले ढिलाइ गर्दा अहिलेसम्म ३० वटा प्रश्नको मात्र जवाफ आएको उनले बताए ।

‘उहाँले मन्त्री रहँदा आफूले गरेको काम सोच्न र सम्झन पनि समय लागेको हुनसक्छ,’ ती वकिलले लोकान्तरसँग भने, ‘मन्त्रीले निर्णयमा हस्ताक्षर गरेको भए पनि कतिपयको जानकारी नहुनसक्छ । त्यही भएर सोचिरहनुभएको हुनसक्छ । हरेक प्रश्नमा विचार गरेर र समय लगाएर मात्रै जवाफ दिइरहनुभएको छ ।’

आरोपी खाँणले दिएको बयान कम्प्युटरमा टाइप गर्ने, प्रिन्ट गर्ने र फेरि उनले पढेर हस्ताक्षर गरेपछि अर्काे प्रश्नमा जाने गरिएको छ ।

मंगलवारै उनको बयान सक्ने तयारी रहेको जिल्ला सरकारी वकिल कार्यालय काठमाडौंका सहन्यायाधिवक्ता अच्युतमणि नेउपानेले लोकान्तरलाई बताए । ‘सम्भव भए आजै उहाँको बयान सकाउने तरखर छ,’ उनले लोकान्तरसँग भने ।

उनको बयान लिने कार्य सोमवारदेखि नै शुरू भएको हो तर उनले पेट खराब भएर आफूलाई सन्चो नभएको बताएपछि उनको बयान मंगलवार पनि गरिएको हो । 

अर्का आरोपित पूर्व उपप्रधानमन्त्री समेत रहेका सांसद टोपबहादुर रायमाझीको बयान सोमवार नै सम्पन्न भइसकेको छ । सोमवार अपराह्न ४ बजेदेखि राति साढे ९ बजेसम्म रायमाझीको बयान लिइएको थियो ।