अर्थमन्त्री डा. प्रकाशशरण महतले पछाडि परेका क्षेत्र, समूह, वर्गलाई लक्षित गरेर सरकारको आगामी आर्थिक वर्षको बजेट ल्याउने बताएका छन् । आइतवार संघीय संसद् भवन परिसरमा सञ्चारकर्मीहरूले राखेका जिज्ञासाको जवाफ दिने क्रममा उनले बजेट समग्र जनता र देशलाई केन्द्रित गरेर आउने बताए । 

बजेट कार्यान्वयनमा पनि सरकारले विशेष जोड दिने उनले बताए । 'समग्र जनता, देश, पछाडि परेका क्षेत्र, समूह, वर्ग, लिङ्गलाई मध्यनजर राखेर बजेट आउँछ,' उनले भने, 'हामीले कार्यान्वयनमै जोड दिएका छौं । कार्यान्वयन अत्यन्तै महत्वपूर्ण विषय हो । जतिसुकै राम्रा कुरा भए पनि कार्यान्वयन भएन भने समस्या आउँछ । परिणाम आउँदैन ।'

सरकारले जेठ १५ गते (भोलि) आगामी आर्थिक वर्षका बजेट संसदमा पेश गर्दैछ ।