लोकप्रिय गायक प्रकाश सपूतले क्यानडामा प्रस्तुति दिने भएका छन् । आफ्नो लोकप्रिय गीत ‘बोल माया’को दोस्रो भाग ल्याउने तयारीमा रहेका यी गायकले आउँदो जुलाई १६ मा ‘सकम्बरी साँझ विथ प्रकाश सपूत’मा आफ्नो प्रस्तुति दिने भएका हुन् । 

आगन इभेन्ट्स एण्ड झुमर इन्टरटेनमेन्ट कर्पोरेशनको आयोजनामा गायक प्रकाश पहिलो पटक क्यानडामा प्रस्तुत हुँदैछन् । उनले क्यानडाको प्रस्तुतिलाई लिएर उत्साहित रहेको बताए । 

कार्यक्रममा प्रकाशसँगै स्थानीय कलाकर्मीले समेत आफ्नो प्रस्तुति दिनेछन् । दुई निकै चर्चित गीतहरू ‘बोलमाया’ र ‘गलबन्दी’बाट स्थापित भएका प्रकाशको प्रस्तुति हेर्न क्यानडामा रहेका नेपाली प्रतिक्षारत रहेको आयोजक ज्ञान भण्डारीले जानकारी दिए । ‘प्रकाशजीलाई प्रत्यक्ष सुन्न र हेर्न हामी प्रतीक्षा गरिरहेका छौँ । उहाँको गीतहरू नेपाल झैँ क्यानडामा पनि लोकप्रिय छन्’, ज्ञानले भने । उनि नेपाली गतिविधिमा सक्रिय रहेर नेपाली कला र संस्कृतिलाई क्यानडामा प्रवर्द्धन गर्न तत्पर युवा व्यवसायी हुन् । 

उनले यो कार्यक्रम गर्नुको उद्देश्य नै संस्कृति र कलाको प्रवर्द्धन रहेको बताए । ‘कार्यक्रमबाट आर्जन भएको मुनाफा धार्मिक कार्यमा हस्तान्तरण गर्ने छौ’, उनले भने । 

मिलक्रिक रोड, मिसीसागामा रहेको स्वागत ब्याङ्कवेट हलमा हुने कार्यक्रममा प्रवेश वापतको शुल्क क्यानेडियन ३० (तीस) डलर राखिएको छ ।