नेपाली कांग्रेसका महामन्त्री गगनकुमार थापाले निराश भएका युवालाई आशा जगाउने कांग्रेस चाहिएको बताएका छन् ।

मोरङको विराटचोकमा कांग्रेसको निर्वाचन क्षेत्र नम्बर ३ को प्रथम क्षेत्रीय सम्मेलनमा सम्बोधन गर्दै महामन्त्री थापाले भोलिको बारेमा आशा देखाउन नसक्ने नेतृत्व पार्टीका कार्यकर्ता र शुभचिन्तकले नचाहेको बताए ।

कमजोर पार्टीको महामन्त्री हुनुभन्दा बलियो पार्टीको कार्यकर्ता हुनु वेश भएको उनले बताए । उनले सभापति शेरबहादुर देउवाले नेतृत्व परिवर्तनका लागि मार्गप्रशस्त गर्नुपर्ने समेत बताए ।

कार्यक्रममा जानु अगाडि विराटनगर विमानस्थलमा उनले सभापति देउवाले पार्टी र प्रधानमन्त्रीमा आश गर्न नहुने बताएका थिए ।

भोलिको बारेमा आशा देखाउन नसक्नु नेतृत्वको कमजोरी रहेको थापाले बताए । उनले आगामी चुनावको चिन्ताभन्दा पनि काम गर्नुपर्ने बताएका छन् ।
 
‘२०८४ सालको चुनाव गाह्रो छ भने हाम्रै पार्टीका नेता कार्यकर्ताले भनेको सुनेको छु । ३२९ पालिकामा कांग्रेसले जितेको छ । ५ प्रदेशमा ठूलो दल हाम्रो नै छ । केन्द्रमा पनि कांग्रेस सबैभन्दा ठूलो दल हो,’ थापाले भने, ‘चुनाव लड्न पार्टी स्थापना भएको हैन । समस्यालाई चिन्छ र आशा जगाउँछ । कांग्रेस अभिभावक हो । २०८४ सालको निर्वाचनमा मेयरको टिकट पालिकाका कार्यकर्ता र वडाका उम्मेदवारको तय वडाले नै गर्न पाउनुपर्छ । अनि कसरी कांग्रेसले जित्दैन हेरौं !’ उनले भने । 

महामन्त्री थापाले कार्यकर्तालाई निराश नहुन समेत आग्रह गरेका छन् ।