नेकपा एमालेकी सांसद विद्या भट्टराईले बजेट खर्च गर्न नसक्ने स्थितिको अन्त्य हुन जरुरी रहेको बताएकी छन् ।

बिहीवार शिक्षा, स्वास्थ्य तथा सूचना प्रविधि समितिको बैठकमा बोल्दै उनले यस्तो बताएकी हुन् । उनले सरकार बजेट छैन भन्ने तर आर्थिक वर्ष सकिन लाग्दा बजेट खर्च नहुने परिपाटीको अन्त्य गर्न लाग्नुपर्ने बताए ।

उनले बजेट खर्च गर्न नसके कारबाही भोग्न सम्बन्धित पक्षहरू तयार हुनुपर्ने बताए । उनले एसियन गेमको खाकाबारे समितिमा जानकारी गराउन युवा तथा खेलकुद मन्त्रालयसँग आग्रह गरिन् ।

उनले भनिन्, ‘बजेट छैन भनिन्छ तर फिर्ता गर्छौं, यो संस्कृति कहिलेसम्म रहन्छ ? त्यसका लागि चुनौती के हुन् ? हामीले के सहजीकरण गर्नुपर्छ ? यो संस्कृति बदल्नुपर्छ, हामी जनताका लागि, देशका लागि भन्ने तर किन जिम्मेवार बन्न नसक्ने, बजेट छैन भन्ने तर खर्च किन हुन नसक्ने ? अब बजेट खर्च भएन भने त्यसको जिम्मेवारी कसले लिने, दण्डित हुने कि नहुने ? एसियन गेमको कुरा छ, यसको तयारी के छ ? यसको खाका मन्त्रालयसँग हुनुपर्छ । यसमा विवाद छ भनिन्छ, कमी कमजोरीको छलफल गर्न सहज हुन्छ ।’

उनले युवाहरूले स्वामित्व लिनसक्ने गरी कार्यकारी अधिकार सहितको युवा परिषद्को निर्माण गर्ने कुरालाई मन्त्रालयले नेतृत्व गर्नुपर्ने बताइन् ।