पूर्व प्रधानमन्त्री डा. बाबुराम भट्टराईले घुमाउरो भाषामा टिप्पणी गर्दै कोशी प्रदेशमा राप्रपाको पाउ परेर सरकार बनाउन मरिहत्ते गर्नुभन्दा मध्यावधि निर्वाचनमा जाने विकल्प स्वीकार्नु उपयुक्त होइन र भनेर प्रश्न गरेका छन् ।

शनिवार साँझ सामाजिक सञ्जाल ट्विटरमा लेख्दै डा. भट्टराईले राप्रपातर्फ संकेत गर्दै घोषित रूपमा गणतन्त्र, संघीयता, धर्मनिरपेक्षता विरोधी र सारतत्वमा यो व्यवस्था उल्ट्याएर प्रतिक्रान्ति गर्न उद्यत शक्तिको पाउ परेर सरकार बनाउन मरिहत्ते गर्नुभन्दा मध्यावधिमा जानुपर्ने सुझाव दिए ।

कोशी प्रदेशमा सभामुखको समर्थनमा बनेको सरकार असंवैधानिक ठहर भएपछि अब राप्रपाको समर्थन विना सत्तारुढ गठबन्धनले सरकार बनाउन सक्ने अवस्था छैन । नेपाली कांग्रेस संसदीय दलका नेता उद्धव थापाले राप्रपालाई फकाउन प्रयास गरिरहेको समाचार आइरहेका बेला डा. भट्टराईको यस्तो टिप्पणी आएको हो ।

डा. भट्टराईले लेखेका छन्, ‘१ नम्बर प्रदेशमा घोषित रूपमा गणतन्त्र, संघीयता, धर्मनिरपेक्षता विरोधी र सारतत्वमा यो व्यवस्था उल्ट्याएर प्रतिक्रान्ति गर्न उद्यत शक्तिको पाउ परेर सरकार बनाउन मरिहत्ते गर्नुभन्दा यो संविधानका अन्तरवस्तु स्वीकार्ने शक्तिहरू मिलेर सरकार बनाउने नत्र मध्यावधिमा जाने विकल्प स्वीकार्नु उपयुक्त होइन र ? यस्तै सत्तालिप्साले संघीय लोकतान्त्रिक गणतन्त्र कमजोर बन्छ र प्रतिक्रान्तिको आधार तयार हुन्छ भन्ने कुरा कमसेकम हाम्रा लोकतन्त्रवादी मित्रहरू र क्रान्तिकारी कणहरूले त बुझ्नुपर्ने !’