लोकतान्त्रिक समाजवादी पार्टी (लोसपा) नेपालका शीर्ष नेताहरूले छोरीज्वाइँदेखि सम्धीसम्धिनीसम्मलाई पदाधिकारी बनाएका छन् ।

लोसपाका अध्यक्ष महन्थ ठाकुरले सम्धी उमाकान्त झालाई वरिष्ठ उपाध्यक्ष, सम्धिनी इन्दिरा झालाई उपाध्यक्ष र छोरी मिनाक्षी ठाकुरलाई केन्द्रीय सदस्य मनोनयन गरेका छन् ।

त्यसैगरी वरिष्ठ नेता राजेन्द्र महतोले आफ्ना ज्वाइँ अनिल महासेठलाई महासचिव बनाएका छन् भने भतिज उपेन्द्र महतोलाई पनि महासचिवमै मनोनयन गरेका छन् ।

त्यसैगरी अर्का  वरिष्ठ नेता शरतसिंह भण्डारीले छोरी सृष्टि सिंह भण्डारीलाई सचिव बनाएका छन् ।

भण्डारी निकट मानिने निर्जला राउतलाई वरिष्ठ उपाध्यक्ष तथा कोषाध्यक्षको दोहोरो जिम्मेवारी दिइएको छ ।

राष्ट्रिय पार्टी बन्न नसकेको लोकतान्त्रिक समाजवादी पार्टीमा ६३ जना पदाधिकारी चयन गरिएको छ ।

१ अध्यक्ष, ३ वरिष्ठ नेता, १ वरिष्ठ सह-अध्यक्ष , ६ वरिष्ठ उपाध्यक्ष, १५ उपाध्यक्ष, १६ महासचिव, ८ सह-महासचिव, ११ सचिव, १ कोषाध्यक्ष, १ सह-कोषाध्यक्ष र १ प्रवक्ता चयन गरिएको छ ।

१८४ जना केन्द्रीय सदस्य चयन गरिएको छ ।

महन्थ ठाकुर अध्यक्ष, राजेन्द्र महतो, शरतसिंह भण्डारी र अनिलकुमार झालाई वरिष्ठ नेता तथा सर्वेन्द्र नाथ शुक्ललाई वरिष्ठ सह-अध्यक्ष बनाइएको छ ।

जितेन्द्रप्रसाद सोनार, उमाकान्त झा, लक्ष्मणलाल कर्ण, अकवाल अहमद शाह, निर्जला राउत र प्रदीप नारायण यादवलाई वरिष्ठ उपाध्यक्ष बनाइएको छ ।

निर्जला राउतलाई कोषाध्यक्षको पनि भूमिका दिइएको छ ।

महासचिवमा परमेश्वर साह, अभिराम शर्मा, केशव कुमार झा, डा. सुरेन्द्रकुमार झा, कविन्द्रनाथ ठाकुर, रामप्रवेश बैठा, हरिप्रसाद मण्डल, मुकेश झा, ज्ञानेन्द्रकुमार झा, विनोद सिंह, देवेन्द्र यादव, अभय सिंह, जयनुल राइन, उपेन्द्र महतो, अनिल महासेठ र अमर यादव छन् ।

डा. आभास लाभलाई प्रवक्ता बनाइएको छ ।