एमालेको कोशी अधिवेशन अपडेटः निर्धारित समयमा मतगणना हुन सकेन, ४ बजेलाई सर्‍यो

नेकपा (एमाले) कोशी प्रदेश अधिवेशनबाट नेतृत्व चयनका लागि भएको निर्वाचनको मतगणना सोमवार दिउँसो ४ बजेपछि मात्रै हुने भएको छ । 

आइतवार राति १० बजेदेखि शुरू भएको मतदान सोमवार बिहान ५ बजे सकिएको थियो । ९९७ जना प्रतिनिधि रहेकोमा ९७७ मत खसेको थियो । 

यसअघि दिउँसो १ बजे मतगणना गर्ने बताए पनि साढे २ बजेसम्म शुरू भएको छैन । अब ४ बजेपछि मात्रै मतगणना गरिने निर्वाचन कमिटीले जनाएको छ । 

अधिवेशनमा ३५ स्थानमा मतदान भएको थियो । मतगणनाका लागि ७ स्थान गर्ने तयारी थालिएको छ । अध्यक्षका लागि विनोद ढकाल र घनश्याम खतिवडाबीच चुनावी प्रतिस्पर्धा भएको हो ।

अधिवेशनबाट ५ पदाधिकारीसहित २१५ सदस्यीय समिति निर्माण हुनेछ । त्यसका लागि ४५० जनाको उम्मेदवारी परेको थियो । जसमध्ये उपाध्यक्षमा टीकाराम चेम्जोङ निर्विरोध चयन भइसकेका छन् । 

यस्तै सचिवमा  पाँचथरका राजकुमार भण्डारी र उदयपुरका शैलेश लामाबीच प्रतिस्पर्धा भएको छ । उपसचिवमा झापाकी जलवर्षा राजबंशी, मोरङका खेमराज नेपाली, खोटाङका देवान राईबीच प्रतिस्पर्धा छ ।