पोखराको सूर्यदर्शन बचत तथा ऋण सहकारी ठगी आरोपमा फरार शिवबहादुर गुरुङ ( महेन्द्र भोटे) लाई मङ्गलबार जिल्ला अदालत कास्कीमा उपस्थित भए पनि थुनछेक बहस नसकिएपछि कास्की प्रहरीको हिरासतमा राखिएको छ ।

राष्ट्रिय युवा सङ्घ नेपालका केन्द्रीय उपमहासचिवसमेत रहेका गुरुङ सूर्यदर्शन सहकारी सञ्चालक समितिका पूर्वसदस्य हुन् । गुरुङले सहकारीको नौ करोडभन्दा बढी हिनामिना गरेको पोखरा महानगरले गरेको छानबिन समितिको प्रतिवेदनमा उल्लेख छ ।

गुरुङ सूर्यदर्शनकै आइटी प्रमुख भविश्वर अर्यालसहित मगलबार दिउँसो कास्की जिल्ला अदालतमा उपस्थित भएको प्रहरीले जनाएको छ । गुरुङ स्थानीय निर्वाचनमा पालिका अध्यक्षका प्रत्याशी तथा कास्कीको मादी गाउँपालिकामा नेकपा (एमाले) तर्फबाट अध्यक्षमा उम्मेदवार भए पनि नेपाली कांग्रेसका उम्मेदवार देवीजङ्ग गुरुङसँग पराजित भएका थिए । गोरखापत्रमा खबर छ ।