नापी कार्यालय बुटवलका तत्कालीन नापी निरीक्षक ध्रुवराज मरासिनीसहित ५ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । 

सार्वजनिक बाटोलाई कित्ताकाट गरी व्यक्तिको नाममा दर्ता गर्नुका साथै सरकारी नक्सा नम्बर समेत फरक पारेको अभियोगमा कैद र जरिवानाको मागदाबी लिएर सोमवार विशेष अदालतमा भ्रष्टाचार मुद्दा दायर गरिएको हो । 

'सार्वजनिक बाटोलाई व्यक्तिका नाममा कायम गरी व्यक्तिलाई नै लाभ हुने किसिमले खरिदबिक्री गर्ने/गराउने कार्यको कसूर गरेको देखिँदा निजलाई भ्रष्टाचार निवारण ऐन, २०५९ को दफा ११ तथा दफा ८ को उपदफा (१) बमोजिम कैद र जरिवानाको मागदाबी लिइएको छ,' मरासिनीको हकमा अख्तियारले दायर गरेको आरोप पत्रमा भनिएको छ ।

मुद्दा दायर गरिएकामा मरासिनीका अलावा सोही कार्यालयका तत्कालीन सर्वेक्षक शिवनाथ मण्डल र शोकत अली खाँ तथा जग्गाधनी नन्दबहादुर काला थापा र मानप्रसाद श्रेष्ठ छन् ।

जग्गाधनीहरूको हकमा जग्गा जफत गरी सार्वजनिक गर्ने प्रयोजनका लागि प्रतिवादी बनाइएको छ ।