साम्राज्ञी राज्यलक्ष्मी शाह र धिरज मगरलाई शीर्ष भूमिकामा लिएर रोमान्टिक फिल्म ‘रुमानी रङ्ग’ निर्माण हुने भएको छ । 

अनिल योञ्जनको निर्देशन रहने यो फिल्ममार्फत साम्राज्ञी र धिरजले ‘इन्टु मिन्टु लन्डनमा’पछि दोस्रोपटक पर्दामा एकसाथ रोमान्स गर्ने भएका हुन् ।
उनीहरू लगभग पाँच वर्षपछि एकसाथ पर्दामा आउन लागेका हुन् । 

बिहीवार राजधानीमा एक कार्यक्रमकाबीच निर्माण घोषणा भएको यो फिल्ममा कथा/पटकथा/संवाद निर्देशक योञ्जनकै रहनेछ । ग्लोबल मिडिया एण्ड रिसर्च सेन्टर प्रा लिको व्यानरमा निर्माण रहने फिल्ममा जीएम ठकुरी प्रस्तुतकर्ता छन् भने हरि मल्ल ठकुरी निर्माता हुन् । 

यसअघि यो टिमले एक्सन थ्रिलर ‘लाखे’ निर्माण गरेको थियो । फिल्ममा आविष्कार बहुसंचार प्रा.लिको सहकार्य रहनेछ भने अष्ट्रेलियाको लाइन प्रोडियूसरमा डिव्वाईज इन्टटेन्मेन्ट रहेको छ । यो कम्पनीले ‘डमरूको डण्डीवियो’, ‘नेप्टे’, ‘क्याप्टेन’ तथा ‘ए मेरो हजुर’ लगायतका १० बढी नेपाली फिल्मको अष्ट्रेलियामा वितरण गरिसकेको छ । 

‘रुमानी रङ्ग’को ९० प्रतिशत सुटिङ अष्ट्रेलियामा हुनेछ भने बाँकी १० प्रतिशत नेपालमा हुनेछ । फिल्मले वर्तमान समयको आधुनिक प्रेमकथा प्रस्तुत गर्ने जानकारी निर्माणपक्षले दिएको छ । निर्माणपक्षले यसलाई रंगीन प्रेमकथा भनेको छ । 

फिल्मले सजिलोसँग तोडिने र गार्होसँग जोडिने मायालाई हँसाएर, रुवाएर विदेशमा बस्ने विद्यार्थीको दुःखसमेत देखाउनेछ । फिल्म वैशाखको पहिलो साताबाट फ्लोरमा जाने बताइएको छ । महेश पौडेलको सिनेम्याटोग्राफी रहने फिल्ममा सुशील थापा, श्रीजन बस्नेत, सन्तोष सरु तथा विजय अधिकारी सह–निर्माता छन् ।