अतिरिक्त शुल्क मागेर छात्रालाई कुटपिट गर्दै दुर्व्यवहार गरेको आरोपमा पक्राउ परेकी होस्टेलकी सञ्चालिका मधु रेग्मी ४१ हजार रुपैयाँ राखेर धरौटीमा रिहा भएकी छिन् । विराटनगर– ८ मधुमारामा रहेको मुनलाइट गल्र्स होस्टेलकी सञ्चालिका ५० वर्षीया रेग्मी मंगलवार रिहा भएकी हुन् ।  

अभद्र व्यवहार मुद्दामा पक्राउ परेकी रेग्मीलाई जिल्ला प्रशासन कार्यालय मोरङका प्रमुख जिल्ला अधिकारी प्रेमप्रसाद भट्टराईको इजलासले ४१ हजार रुपैयाँ धरौटी तोकेको हो । प्रशासनले तोकेको धरौटी रकम बुझाएर मंगलवार साँझ उनी रिहा भएको मोरङका सहायक प्रमुख जिल्ला अधिकारीसमेत रहेका सूचना अधिकारी प्रदीप साहले लोकान्तरलाई जानकारी दिए । 

विराटनगर नर्सिङ क्याम्पसमा बीएनएस र बीएस्सी नर्सिङमा अध्ययनरत तीनजना छात्रामाथि हातपात गर्दै दुर्व्यवहार गरेको आरोपमा रेग्मी गत बुधवार पक्राउ परेकी थिइन् । मोरङ प्रहरीले पक्राउ गरेर उनलाई अभद्र व्यवहारको मुद्दामा म्याद थप गरी अनुसन्धान शुरू गरेको थियो । उनी पक्राउ परेलगतै बिरामी रहेका भन्दै अस्पताल भर्ना भएकी थिइन् । प्रहरीले अनुसन्धान पूरा गरेपछि मंगलवार मोरङ प्रशासनमा अभियोग बुझाएको थियो । उनी विराटनगरकै नेपाली कांग्रेसका एक नेताकी श्रीमतीसमेत हुन् । रेग्मीले मंगलवार साँझ तीनजना छात्रामाथि होस्टेलको कोठाभित्र हातपात गरेको भिडियो सामाजिक सञ्जालमा भाइरल भएको थियो । 

होस्टेलमा बसिरहेका विद्यार्थीले अतिरिक्त रकम दिन नमानेपछि रेग्मीले उनीहरूका सामान कोठाबाट बाहिर फ्याँक्दै हातपातसमेत गरेकी थिइन् । दुर्व्यवहारमा परेका विराटनगर नर्सिङ क्याम्पस पहिलो वर्षमा भर्ना भएका विद्यार्थी जुम्ला, पाल्पा र कञ्चनपुर घर भएका हुन् । उनीहरू उक्त होस्टेलमा फागुन ३ गतेदेखि बस्दै आएका थिए । 

उनीहरूले ३ चैतसम्मका लागि अग्रिम आठ हजार रुपैयाँ बुझाएका थिए । उनीहरू बुधवारदेखि आफू अध्ययनरत कलेजकै होस्टेलमा बस्ने तयारीमा थिए । ३ चैतसम्मको पैसा तिरिसकेको र त्यसअघि नै कलेजको होस्टेलमा जाने भनेपछि सञ्चालिका रेग्मीले ती विद्यार्थीसँग थप तीन–तीन हजार रुपैयाँ मागेकी थिइन । तर अतिरिक्त पैसा नदिने भनेर विद्यार्थीले भनेपछि उनले हातपात गरेको क्याम्पस प्रशासनले जनाएको छ ।

रेग्मीले तीनजना छात्राबाट जनही तीन–तीन हजार रुपैयाँ उठाउँदा नौ हजार हुने थियो । तर अहिले उनले ४१ हजार धरौटी बुझाउनु परेको छ । रकमसँगै उनले इज्जतसमेत गुमाएकी छिन् । उनको होस्टेललाई नै अब आर्थिक र सामाजिक दुवै ढंगले घाटा लाग्ने विश्लेषण गरिएको छ ।