‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ– 

मेडिकल व्यवसायी दुर्गा प्रसाईंको पक्षमा सर्वोच्च अदालतले आदेश दिएको छ । सर्वोच्चको आदेशअनुसार प्रसाईंको मेडिकल कलेजले सम्बन्धन पाउने बाटो खुला भएको छ । 

झापाको बिर्तामोडमा बीएण्डसी मेडिकल कलेजको सम्पूर्ण भौतिक संरचना निर्माण भए सम्पन्न भएपनि पठनपाठनका लागि प्रसाईंले लामो समययता सम्बन्धन पाउन सकेका छैनन् । सोही कारण प्रसाईंले निरन्तर सरकारको आलोचनाका साथसाथै असन्तुष्टि पोख्दै आएका छन् ।  

यही विवादका बीचमा सर्वोच्च अदालतले बुधबार प्रसाईंको अर्बौँ लगानी भइसकेको मेडिकल कलेजलाई सम्बन्धन दिन आदेश जारी गरेको हो।

 न्यायाधीशहरू डा कुमार चुडाँल र सारङ्गा सुवेदीको संयुक्त इजलासले प्रक्रिया पुगेको भए बीएण्डसी मेडिकल कलेजलाई सम्बन्धन नरोक्न आदेश जारी गरेको हो। 
००००
सर्वोच्चको आदेशले यस्तै झमेलामा रहेका थप १३ मेडिकल कलेज उत्साहित भएका छन् । सरकारले मेडिकल कलेज निर्माण गर्न आसयपत्र दिएपनि सञ्चालन अनुमति नपाएका थप १३ मेडिकल कलेज छन् ।  अब ती कलेजलाई पनि प्रसाईंको बीएण्डसी कलेजको फैसला नजिर हुने छ । 
यस्ता मेडिकल कलेजहरुमा नेपाल प्रहरी मेडिकल कलेज, मनमोहन मेडिकल कलेज, काठमाडौँ नेसनल मेडिकल कलेज, पुष्पलाल मेडिकल कलेजलगायत रहेका छन् ।
००००
होली मनाएर रमाइलो गर्दै कर्णाली पुलबाट नदीमा फाल हानेका १७ जना युवामध्ये एकजना बेपत्ता भएका छन् । बेपत्ता हुनेमा कैलालीको चिसापानी ३० वर्षीय युवा लोकेन्द्र शाही छन् । 

होली मनाउने क्रममा मदिरा सेवन गरेका युवाहरू पौडी खेल्ने उद्देश्यले कर्णाली पुलबाट फाल हानेका थिए । तीमध्ये एकजना भने बेपत्ता भएका हुन् । उनको खोजी कार्य तीव्र पारिएको जिल्ला प्रहरी कार्यालय कैलालीका प्रहरी नायब उपरीक्षक (डीएसपी) कुलदीप चन्दले जानकारी दिए ।
००००
‘सीमावासीसँग सशस्त्र प्रहरी कार्यक्रम’ अन्तर्गत सशस्त्र प्रहरी बल नेपालले चौविसै घण्टा सीमा क्षेत्रमा गस्ती परिचालनको लागि ‘सीमा पैदल गस्ती परिचालन सम्बन्धि अवधारणा पत्र, २०८०’ तयार गरी लागू गरेको छ ।

 अन्तर्राष्ट्रिय सीमा इलाकामा एक प्लटुन सशस्त्र प्रहरी बल नेपालको फौज परिचालन मार्फत सीमा सुरक्षालाई थप प्रभावकारी बनाउने उद्देश्यले यो अवधारणा पत्र तयार गरी लागू गरिएसँगै अब प्रत्येक प्रदेशमा सशस्त्र प्रहरी निरीक्षकको कमाण्डमा एक प्लटुन टोली चौविसै घण्टा सीमा गस्तीमा तैनाथ रहनेछ ।  
००००
प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले सोच विचार गरेर नै नयाँ गठबन्धन बनाइएको बताएका छन् । 
पार्टी केन्द्रीय कार्यालय पेरिसडाँडामा पार्टीको वाग्मती प्रदेश समितिको बैठकलाई सम्बोधन गर्दै उनले राष्ट्रिय आवश्यकता र जनचाहनालाई ख्याल गरेर नयाँ गठबन्धन बनाइएको स्पष्ट पारे । उनले हालको सत्तागठबन्धनलाई लामो समयसम्म लैजाने सोच र लक्ष्यका साथ पार्टीले निर्णय गरेकाले त्यसलाई अक्षरश लागू गरिने स्पष्ट पारे ।
००००
राष्ट्रिय स्वतन्त्र पार्टी (रास्वपा)का सहमहामन्त्री विपिन कुमार आचार्यले इलाम २ मा हुने उपनिर्वाचनमा आफ्नो दलको उम्मेदवारको सन्दर्भमा सामाजिक सञ्जालमा चलेका हल्लाहरू निराधार रहेको बताएका छन् । 

सोमबार फेसबुकमार्फत उनले रास्वपाको उम्मेदवार छनौट लोकतान्त्रिक मुल्यमान्यता र पारदर्शिताको सिद्धान्तको आधारमा हुने उल्लेख गर्दै आचार्यले हल्लाहरूलाई विश्वास नगर्न सबैलाई आग्रह पनि गरेका छन् ।
००००
चीन भ्रमणमा रहेका उपप्रधान तथा परराष्ट्रमन्त्री नारायणकाजी श्रेष्ठले चिनियाँ जनराजनीतिक परामर्शदात्री सम्मेलन (सीपीपीसीसी)का अध्यक्ष वाङ हुनिङसँग भेटवार्ता गरेका छन् ।
परराष्ट्रमन्त्री श्रेष्ठ र चिनियाँ कम्युनिस्ट पार्टीको राजनीतिक ब्युरोका स्थायी समिति सदस्यसमेत रहेका वाङबीच सोमवार बेइजिङमा भएको छलफल आर्थिक विकास र समृद्धिमा केन्द्रित रहेको परराष्ट्र मन्त्रालयले जनाएको छ ।
००००
काठमाडौंको प्रमुख पर्यटकीय गन्तव्य ठमेल र दरबारमार्गलाई २४ सै घण्टा खुलाउनका लागि आवश्यक सुरक्षा योजनाबारे छलफल भएको छ ।
जिल्ला प्रशासन कार्यालय काठमाडौंमा सोमबार ठमेल र दरबारमार्ग क्षेत्रलाई २४ सै घण्टा खुलाउने तयारीबारे सम्बन्धित निकाय तथा व्यवसायीसँग छलफल गरिएको हो ।
००००
पर्यटन विभागले वसन्त ऋतुको हिमाल आरोहणका लागि धमाधम आरोहण अनुमति दिन शुरू गरेको छ ।
यसवर्ष सर्वोच्च शिखर सगरमाथासहितका हिमाल आरोहणका लागि अनुमति दिन शुरू गरिएको विभागले जनाएको छ ।
००००
नेपाली कांग्रेस कोशी प्रदेशले इलाम २ मा हुने उपनिर्वाचनको लागि ७ आकांक्षीको नाम सिफारिस गरेको छ ।
नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेलले कोशी प्रदेशबाट ७ जनाको नाम सिफारिस भएर आएको जानकारी दिए ।
००००
फितलो तयारी र कानूनी जटिलताका कारण यही वैशाख १६ र १७ गते हुने भनिएको तेस्रो लगानी सम्मेलन औपचारिकतामा मात्र सीमित हुने जोखिम बढेको छ । 
यसअघि सरकारले तत्कालीन अर्थमन्त्री डा प्रकाशशरण महतको प्रस्तावमा लगानी सम्मेलन गर्ने निर्णय गरेको थियो । लगानी सम्मेलनको टुंगो लागेको ६ महिना बितिसक्दा पनि सरकारले पर्याप्त तयारी गर्न सकेको छैन । 
००००
नेपाल स्टक एक्सचेन्ज (नेप्से) परिसूचक सोमबार  १७ दशमलव ०१ अङ्कले घटेर २ हजार ३१ दशमलव ५५ को विन्दुमा पुगेको छ ।
सोमबार तीन सय चार कम्पनीका ७० लाख ६१ हजार १२ कित्ता शेयर ४४ हजार दुई सय ३६ पटक खरिदबिक्री हुँदा रु दुई अर्ब ४८ करोड ९१ लाख १८ हजार चार सय ८५ बराबरको कारोबार भएको छ ।
००००
नवनियुक्त वन तथा वातावरण राज्यमन्त्री दीपक कार्कीले शपथ लिएका छन् । उनलाई सोमवार दिउँसो प्रधानमन्त्री तथा मन्त्रिपरिषदको कार्यालय, सिंहदरबारमा आयोजित कार्यक्रममा प्रधानमन्त्री पुष्पकमल दाहाल प्रचण्डले पद तथा गोपनीयताको शपथ ग्रहण गराएका हुन् ।
००००
नेपाली कांग्रेस राष्ट्रिय सभा संसदीय दलको प्रमुख सचेतकमा कृष्णबहादुर रोकाय मनोनीत भएका छन् ।
कांग्रेस संसदीय दलको नेताको निजी सचिवालयका निजी सचिव केशवराज जोशीले सोमवार एक विज्ञप्ति जारी गर्दै सोबारे जानकारी दिएका हुन् ।