इलाम–२ मा वैशाख १५ गते हुने उप निर्वाचनका लागि प्रमुख प्रतिपक्षी दल नेपाली कांग्रेसले अझै उम्मेदवार चयन गरेको छैन । मतदाताको भावना बुझ्न महामन्त्री विश्वप्रकाश शर्मा आफैं निर्वाचन क्षेत्रमा खटिएका छन् । अहिले मतदाताको आकाङ्क्षा र भावना बुझ्ने काम भइरहेको उनले बताए । ‘हामीले पार्टीका नेता तथा मतदातासँग उम्मेदवार छनोट र कसरी जीत निकाल्ने भनेर छलफल गरिरहेका छौ,’ उनले भने, ‘२० गतेसम्म उम्मेदवारको टुंगो लगाउँछौ ।’

एमालेले भने उम्मेदवार टुंग्याएर मैदानमा पठाइसकेको छ । सत्ता गठबन्धन मै रहेका माओवादी केन्द्र र एकीकृत समाजवादीले पनि उम्मेदवार उठाउने भएका छन् ।  एमालेले इलाममा सुवासका छोरा सुहाङलाई उम्मेदवार बनाएको छ । 

इलाम क्षेत्र नम्बर २ को राजनीतिक अवस्था बुझ्न प्राध्यापकहरू खटाइएको शर्माले बताए । ‘हाम्रो अवस्थाको अध्ययन गर्न प्राध्यापकहरूलाई खटाएका छौं । उहाँहरूले १९/२० गतेतिर अध्ययनको प्रतिवेदन हामीलाई बुझाउनुहुन्छ । अनि हामी उम्मेदवारको टुंगो लगाउँछौ,’ उनले भने । 
कांग्रेस कोशी प्रदेश समितिले इलाम २ को उपनिर्वाचनका लागि ७ जनाको नाम केन्द्रमा सिफारिस गरेको छ ।

५ जना पुरुष र २ जना महिलाको नाम केन्द्रीय कार्यालय पठाएको हो । डम्बरबहादुर खड्का, भेषराज आचार्य, केशव थापा, नगेन्द्र कुमाल, रमेश लिङ्देन, चन्द्रमाया लिम्बू र शान्तिकला तामाङको नाम सिफारिस गरेको कांग्रेस कोशी प्रदेश समितिले जनाएको छ । 

२०७९ मा भएको आम निर्वाचनमा धोरै मतान्तरले सुवास नेम्मवाङ (हाल स्वर्गीय)ले चुनाव जितेका थिए । तर, त्यति बेला गठबन्धन थियो । माओवादी केन्द्र,  एकीकृत समाजवादीले पनि माओवादीले सहयोग गरेको थियो । चुनावमा पराजय भोगेपछि माओवादीले असहयोग गरेको कांग्रेसले निष्कर्ष निकालेको थियो ।  गत आम निर्वाचनपछि साङ्गठनिक अवस्था राम्रो बनेकाले चुनाव जित्नेमा आशावादी रहेको महामन्त्री शर्माले बताए ।  

माओवादी केन्द्रले धिरेन्द्र शर्मासहित ४ जनाको नाम सिफारिस गरेको छ । गठबन्धनमै रहेको नेकपा (एकीकृत समाजवादी)ले पनि उम्मेदवारको टुङ्गो लगाइसकेको छ । एकीकृत समाजवादीले जितबहादुर राईलाई उम्मेदवार बनाउने निर्णय गरिसकेको छ । यस्तै सत्ता गठबन्धनमै रहेको राष्ट्रिय स्वतन्त्र पार्टी (रास्वपा)ले पनि अहिलेसम्म उम्मेदवारको टुंगो लगाएको छैन । रास्वपाले मिलन लिम्बूलाई उम्मेदवार बनाउने चर्चा रहेको छ ।  । रास्वपाले एक्लै चुनाव लड्ने बताइसकेको छ ।

पहिचानवादीहरूले पनि प्रदेश १ पुनः नामकरण संघर्ष समितिका संयोजक केन्द्रसिंह थेगिमलाई उम्मेदवार बनाउने भएका छन् । सिके राउतको जनमत पार्टीले प्रेमदीप थाम्सुहाङलाई उम्मेदवार बनाइसकेको छ । राप्रपाले पनि आफ्नै उम्मेदवार उठाउँदै छ । 

संविधानसभा अध्यक्ष तथा एमालेका उपाध्यक्ष सुवासचन्द्र नेम्वाङको गत भदौ २६ गते निधन भएपछि सोही निर्वाचन क्षेत्रमा उपनिर्वाचन हुन लागेको हो । यो उपनिर्वाचनलाई दलहरूले आ–आफ्नो प्रतिष्ठाको विषय बनाएका छन् । एमालेले आफ्नो विरासत जोगाउन बल गरिरहेको छ भने अहिलेसम्म त्यो क्षेत्रमा जीत निकाल्न नसकेको  कांग्रेस  चार तारे झन्डा फहराउने दाउमा छ । 

यस्तो छ गत निर्वाचनको परिणाम 
२०७९ को निर्वाचनमा कांग्रेस इलामका सभापतिसमेत रहेका खड्का नेम्वाङसँग झिनो मतान्तरले पराजित भएका थिए । नेम्वाङले ३० हजार २० मत ल्याएर विजयी हुँदा खड्काले २९ हजार ९०६ मत ल्याएका थिए ।  

त्यतिबेला कांग्रेससहति माओवादी, नेकपा (एकीकृत समाजवादी)को गठबन्धन थियो । त्यो क्षेत्रमा । एमालेको समानुपातिक मत सबैभन्दा बढी २६ हजार ५६२ रहेको छ । कांग्रेसले २२ हजार ३३३ मत पाएको थियो । एमालेले कांग्रेसभन्दा ४ हजार बढी मत पाएको थियो । 

माओवादीले समानुपातिकमा ५ हजार १५३ मत पाएको थियो । रास्वपाले समानुपातिक मत ४ हजार ६८६ मत प्राप्त गर्दा प्रत्यक्षतर्फ भने १ हजार ३८० मत मात्रै पाएको थियो । नेकपा एकीकृत समाजवादीले पनि ५ सयभन्दा बढी मत पाएको थियो ।