‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
प्रधानमन्त्री निवास बालुवाटारमा बसेको शीर्ष तीन दलका नेताबीचको बैठकमा शान्ति प्रक्रिया टुङ्गोमा पुर्याउने र नियमित संसद् सञ्चालनका विषयमा सकारात्मक छलफल भएको छ । 

प्रधानमन्त्री तथा नेपाल कम्युुनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’, प्रमुख प्रतिपक्षी दल नेपाली कांग्रेसका सभापति शेरबहादुर देउवा र नेपाल कम्युनिष्ट पार्टी (एमाले)का अध्यक्ष केपी शर्मा ओलीबीच छलफल भएको थियो ।

बैठकमा संवैधानिक आयोगहरुमा नियुक्तिको विषयमा पनि छलफल भएको बताइएको छ । जसअनुसार आइतबार संवैधानिक परिषद्को बैठक बोलाइएको छ । 
००००
नेकपा एमालेले वैशाख १५ गते तय भएको उपनिर्वाचनमा पार्टीका उम्मेदवारलाई सत्ता साझेदार दल नेकपा माओवादी केन्द्र र एकीकृत समाजवादी (नेकपा एस) ले समर्थन गर्ने विश्वास लिएको छ । माओवादी र एसले यसअघि नै उपनिर्वाचनमा पार्टीले उम्मेदवारी दिने निर्णय गरेका थिए । 

तर, शनिबार बझाङ काठमाडौं सम्पर्क मञ्चले काठमाडौंमा गरेको कार्यक्रममा पनि एमालेका अध्यक्ष केपी शर्मा ओलीले उपनिर्वाचनमा माओवादी केन्द्रले आफ्नो दलको उम्मेदवारलाई समर्थन गर्ने विश्वास व्यक्त गरे । ओलीले उपनिर्वाचन हुने इलाम–२ को प्रतिनिधिसभा र बझाङ–१ को प्रदेशसभा निर्वाचन क्षेत्रमा एमालेले जित्ने समेत दाबी गरे ।
००००
उपप्रधानमन्त्री तथा गृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेले आफूहरू काम गर्नका लागि सरकारमा सहभागी भएको भन्दै काम गर्न नसकेका दिन सरकारबाट आफैँ बाहिरिने बताएका छन् । 

शनिवार इलाम चोकबजारमा इलाम–२ उपनिर्वाचनका लागि पार्टीका उम्मेदवार घोषणासभालाई उनले भने, ‘रास्वपा सरकारमा नगएको भए हुन्थ्यो भन्ने कुरा पनि आम नागरिकमा छ, तर हामी काम गरेर देखाउनका लागि सरकारमा सहभागी भएका हौँ, केही सङ्केत देखाइसकेका छौँ ।’ सोही अवसरमा रास्वपाका उम्मेदवार मिलन लिम्बुको उम्मेदवारी घोषणा गरिएको थियो । रास्वपाले उपनिर्वाचनको मैदानमा पुगेर चुनाव प्रचार प्रसार सुरु गरेको छ । सत्ता गठबन्धनमा भएपनि रास्वपाले कसैसँग तालमेल नगर्ने स्पष्ट पारिसकेको छ । 
००००
काठमाडौँको प्रमुख पर्यटकीय गन्तव्य ठमेल बजार २४सै घण्टा खुला गर्ने निर्णयमा स्थानीयले असन्तुष्टि व्यक्त गरेका छन् । 
उपप्रधानमन्त्री तथा गृहमन्त्री रवि लामिछानेको निर्देशनपछि जिल्ला प्रशासन कार्यालय काठमाडौँले ठमेल र दरबारमार्गलाई २४सै घण्टा खुला गर्ने तयारी गरेपछि ठमेल क्षेत्रका घरधनीले उक्त निर्णयको विरोध गरेका हुन् ।

 ठमेलका घरधनीको शनिबार बसेको बैठकले ठमेललाई २४सै घण्टा खुलाउने निर्णयको विरोधमा जिल्ला प्रशासन कार्यालय र सरोकारवाला निकायमा ज्ञापनपत्र बुझाउने निर्णय गरेको हो ।
००००
बागमती प्रदेश सरकारमा नेकपा (एमाले) पनि सहभागी भएको छ ।
एमालेको तर्फबाट संसदीय दलका नेतासमेत रहेका जगन्नाथ थपलियाले शनिवार आर्थिक मामिला तथा विकासमन्त्रीको शपथ ग्रहण गरेका छन् ।
००००
सुनसरीको झुम्का कारागारभित्र शनिबार ४२ वर्षीय न्यायधीश राईको मृत्यु भएको छ ।
पत्नी हत्याको आरोपमा कर्तव्य ज्यान मुद्दामा कैद भुक्तान गरिरहेका खोटाङका साकला गाउँपालिका घर भई हाल इटहरी उपमहानगरपालिका–४ मा डेरा गरी बस्दै आएका राईको करागारभित्रै मृत्यु भएको हो ।

शनिबार काठमाडौंबाट गोरखा जाँदै गरेको ट्याक्सी त्रिशूलीमा नदीमा खस्दा मृत्यु भएका पाँच जनाको पहिचान खुलेको छ । दुर्घटनापछि एक जना बेपत्ता छन् । 

प्रहरीका अनुसार ट्याक्सी चालक गोर्खा नगरपालिका–७ का ३५ वर्षीय अर्जुन सिर्मल, सोही ठाउँका ४१ वर्षीया हरिमाया रोकाय, ७० वर्षीया जुनकिरी रोकाय, २८ वर्षीया अञ्जना रोकाय, नौ वर्षीय बालक आगमन नगरकोटीको मृत्यु भएको छ । १८ वर्षीय दिवस रोकाय बेपत्ता छन् । 
 चितवन जिल्ला प्रहरी कार्यालयका प्रमुख भावेश रिमालका अनुसार पारिवारिक कार्यक्रम सकेर काठमाडौंबाट तीन वटा गाडीमा फर्किँदै गर्दा दुर्घटना भएको हो ।
००००
नेकपा एमालेका पूर्वसचिव टोपबहादुर रायमाझीको स्वास्थ्यमा सुधार आएपछि अस्पतालबाट डिस्चार्ज गरिएको छ । 
मनमोहन कार्डियोथोरासिक भास्कुलर तथा ट्रान्सप्लान्ट सेन्टरले नेता रायमाझीको स्वास्थ्यमा सुधार आएपछि डिस्चार्ज गरिएको सेन्टरका वरिष्ठ मुटु रोग विशेषज्ञ डा चन्द्रमणि पौडेलले जानकारी दिए ।
००००
प्रधानमन्त्री पुष्पकमल दाहाल ‘प्रचण्ड’ले सम्पूर्ण वामपन्थी र देशभक्तहरू एक ठाउँमा उभिनुपर्ने बताएका छन् ।

२४ औं जेल ब्रेक स्मृति दिवसका अवसरमा आयोजित कार्यक्रमलाई सम्बोधन गर्दै प्रधानमन्त्री प्रचण्डले यस्तो बताएका हुन् । नयाँ र मौलिक तरिकाले नेपाली समाजवादी क्रान्ति अगाडि बढ्ने उनको भनाइ थियो ।
००००
पोखराको अर्चलेमा दुई जना घाइते हुने गरी भएको बस दुर्घटनाको फोटो सामाजिक सञ्जालमा भाइरल बनेको छ ।

लेखनाथ क्षेत्रको आरुपाटाबाट पोखराका लागि छुटेको ग १ ख ८६८० नम्बरको बस शनिवार बिहान अर्चलेमा दुर्घटना हुँदा बसका चालक टीकाराम विक र सहचालक सालिकराम सुवेदी घाइते भएका छन् ।

जिल्ला प्रहरी कार्यालय कास्कीका अनुसार उनीहरूको पोखरा स्वास्थ्य विज्ञान प्रतिष्ठानमा उपचार भइरहेको छ । अहिले बस दुर्घटना भएको तस्वीर र भिडियो सामाजिक सञ्जालमा भाइरल बनिरहेको छ । बीच सडकमा ठाडो बनेको बसको फोटो र भिडियो सामाजिक सञ्जालमा भाइरल बनेको हो ।