‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

कोशीमा प्रदेशमा सरकारको नेतृत्व गरिरहेको नेपाली कांग्रेसमा विवाद देखिएको छ । इलाम–२ मा हुन गइरहेको उपनिर्वाचनमा केन्द्रबाट नेताहरू आएर एकताको संकेत गरिरहँदा सरकारको विषयलाई लिएर दुई पक्षबीच दोहोरी चल्न थालेको हो । विशेषगरी संस्थापन सभापति शेरबहादुर देउवा (संस्थापन) र डा शेखर कोइराला (इतर) पक्षका नेताबीच विवाद भइरहेको छ । 

बुधबार साँझ आन्तरिक मामिला तथा कानूनमन्त्रीसमेत रहेका कोशी प्रदेश सरकारका प्रवक्ता शमशेर राई कांग्रेस संसदीय दलका नेता उद्धव थापाविरुद्ध खनिए । केदार कार्की नेतृत्वको वर्तमान सरकार अल्पमतमा परेको बताउँदै आएका थापाप्रति उनी खनिएका हुन् ।
००००
नेपाली कांग्रेसका महामन्त्री विश्वप्रकाश शर्माले आफ्नो दल र नेकपा एमाले मिलेको खबर केही समयमै आउने दाबी गरेका छन् । झापामा बिहीवार पुहाँतु चौधरीको शालिक अनावरण गर्दै शर्माले केही समयमै कांग्रेस र एमाले मिलेको खबर आउने दाबी गरेका हुन् ।
००००
नेकपा एमालेका अध्यक्ष केपी शर्मा ओलीले आफ्नो पार्टी पुनः सत्तामा फर्किएपछि देशको ओरालो लाग्ने क्रम रोकिएको दाबी गरेका छन् । ताप्लेजुङ एमालेको जिल्ला पार्टी कार्यालय भवनको बिहीवार उद्घाटन गर्दै ओलीले पार्टीलाई सरकारबाट हटाएर देशलाई ओरालो र कमजोर बनाउन खोजिए पनि त्यो रोकिएको बताए ।
००००
गैरआवासीय नेपाली संघ (एनआरएनए) को दर्ता नवीकरण भएको छ । परराष्ट्र मन्त्रालयले दर्ता हुनुपर्ने मिति भन्दा ६ महिना ढिलागरी नवीकरणको निर्णय गरेको हो । 

हरेक १० वर्षमा हुनुपर्ने संस्था नवीकरण गत अक्टोबरमै हुनुपर्ने भएपनि उच्च अदालत पाटनको फैसलापछि मात्रै मन्त्रालयले नवीकरण गरिदिएको हो । यसअघि संघभित्रको विवादलगायतका कारण मन्त्रालयले नवीकरणमा आलटाल गर्दै आएको थियो । संस्था नवीकरण नभएकै कारण संघको  बद्री केसी पक्ष अदालत पुगेको थियो । 
००००
उपप्रधानमन्त्री तथा गृहमन्त्री रवि लामिछानेले राजस्व चुहावट, छली, ठगी, तस्करी जस्ता गैरकानुनी गतिविधि गर्ने विरुद्ध सरकार निर्मतापूर्वक अघि बढ्ने बताएका छन् । 

गृह र अर्थ मन्त्रालयद्वारा वीरगञ्जमा बिहीबार आयोजित राजस्व अभिवृद्धि तथा चुहावट नियन्त्रणसम्बन्धी गोष्ठीलाई सम्बोधन गर्दै उनले अवैध आर्थिक गतिविधि गर्ने कसैलाई पनि नछाड्ने बताएका हुन् ।
००००
धुलो, धुँवा र तुवालोले विश्वकै प्रदुषित शहरको शीर्ष स्थानमा पुगेको काठमाडौंमा बिहीवार अपरान्ह पानी परेको छ । 
काठमाडौं उपत्यका र आसपासका जिल्लामा दिउँसो परेको पानीका कारण शीतलता अनुभव गरिएको छ । 
००००
गण्डकी प्रदेशका कामचलाउ मुख्यमन्त्री खगराज अधिकारी नेतृत्वले मन्त्रालय फुटाउने निर्णय गरेको छ । 
मंगलवारको मन्त्रिपरिषद्ले मन्त्रालय फुटाएर ९ वटा बनाइने निर्णय गरेको बिहीवार सार्वजनिक भएको छ ।  अहिले गण्डकीमा मुख्यमन्त्रीसहित ७ सदस्यीय मन्त्रिपरिषद् छ । मंगलवार बसेको मन्त्रिपरिषद् बैठकले स्वास्थ्य र कानून मन्त्रालय थप्न सिफारिस गरेको हो ।
००००
एसियाली विकास बैंक (एडीबी)ले आर्थिक वर्ष २०८०–८१ मा नेपालको अर्थतन्त्र ३ दशमलव ६ प्रतिशतले वृद्धि हुने प्रक्षेपण गरेको छ । यसअघि विश्व बैंकले चालु आर्थिक वर्षमा ३ दशमलव ३ प्रतिशतले नेपालको अर्थतन्त्र वृद्धि हुने प्रक्षेपण गरेको थियो ।
००००
एक महिनाको उपवास (रोजा)पछि मुस्लिम धर्मावलम्बीहरूले बिहीबार हर्षोल्लासका साथ ईदपर्व मनाएका छन् । 
००००
सुनको मूल्यमा बिहीबार सामान्य गिरावट आएको छ । नेपाल सुनचाँदी व्यवसायी महासंघका अनुसार बुधबार प्रतितोला एक लाख ३६ हजार आठ सयमा कारोबार भएको छापावाला सुन बिहीबार भने एक लाख छ हजार छ सय निर्धारण भएको छ । यस आधारमा छापावाला सुन तोलामा दुई सयले घटेको छ ।
००००
जिल्ला प्रहरी परिसर काठमाडौंका प्रमुख, प्रहरी वरिष्ठ उपरीक्षक (एसएसपी) भुपेन्द्रबहादुर खत्रीले ठमेल र दरबारमार्ग क्षेत्रलाई चौबिसै घण्टा सञ्चालन गर्नका लागि प्रहरीले विशेष सुरक्षा योजना तयार पारेको बताएका छन् । शनिबारदेखि यी दुई क्षेत्र चौबिसै घण्टा खुल्ने घोषणा भइसकेको छ । 
००००
प्रधानमन्त्री पुष्पकमल दाहाल प्रचण्डले नयाँ समीकरण फुटाउन नेपाली कांग्रेसले उपप्रधान तथा गृहमन्त्री रवि लामिछानेमाथि छानबिनको कुरा उठाएको आरोप लगाएका छन् । बिहीबार विराटनगरमा सञ्चारकर्मीहरूसँग कुराकानी गर्दै उनले समीकरण फुटाउन कांग्रेसले लामिछानेमाथि छानबिनको कुरा उठाएको आरोप लगाए ।