हालान्डले ४ गोल गरेसँगै सिटीको सहज जीत, उपाधि होडमा आर्सनललाई कडा टक्कर

अर्लिङ हालान्ड एक्लैले लगातार चार गोल गरेपछि साविक विजेता म्यानचेस्टर सिटीले इंग्लिस प्रिमियर लिग फूटबलमा उल्भलाई ५–१ गोल अन्तरले सहजै पराजित गरेको छ ।

यस जीतसँगै सिटीले शीर्ष स्थानमा आर्सनललाई उपाधि होडमा कडा टक्कर दिएको छ । लगातार चार प्रिमियर लिग उपाधि जित्ने अभियानमा रहेको सिटी आर्सनलभन्दा मात्र एक अंकले पछि छ ।

घरेलु मैदान एतिहाद स्टेडियममा भएको खेलमा हालान्डले पहिलो हाफमै ह्याट्रिक पूरा गरेका थिए । खेलको १२ औं मिनेटमा पेनाल्टी गोलबाट सिटीलाई अग्रता दिलाएका हालान्डले ३५औं मिनेटमा दोस्रो गोल थपे । यसपछि पहिलो हाफको अतिरिक्त समयमा तेस्रो गोल गर्दै ह्याट्रिक पूरा गरे । उनले तेस्रो गोल पनि पेनाल्टीबाटै गरेका हुन् ।

यसपछि उल्भका ह्वाङ ही चानले ५३औं मिनेटमा सान्त्वना गोल गरे ।

तर लगत्तै खेलको ५४औं मिनेटमा हालान्डले व्यक्तिगत चौथो गोल गरे । पाँचौ गोल भने हालान्डलाई नै रिप्लेस गरेका जुलियन अल्भारेजले सिटीका लागि ८५औं मिनेटमा गोल गरे ।

हालान्डले प्रिमियर लिगमा पहिलो पटक एकै खेलमा चार गोल गरेका हुन् ।

प्रिमियर लिगको शीर्ष स्थानमा रहेको आर्सनलको ३६ खेलबाट ८३ अंक छ । एक खेल कम खेलेको सिटीले ३५ अंक जोडेको छ ।