अभ्यास खेलमा नेपाल विजयी

ह्युस्टन हरिकेन्ससँगको पहिलो अभ्यास खेलमा नेपाल विजयी भएको छ । शुक्रवार राति सम्पन्न खेलमा नेपालले हरिकेन्सलाई ६ रनले पराजित गरेको हो ।

जितका लागि नेपालले दिएको १४७ रनको लक्ष्य पछ्याएको हरिकेन्सले निर्धारित २० ओभरमा ८ विकेट गुमाएर १४० रन मात्र बनाउन सक्यो । हरिकेन्सलाई सस्तैमा समेट्ने क्रममा नेपालका सोमपाल कामी र करण केसीले २/२ विकेट लिए । रोहित पौडेल, अविनास बोहरा, सागर ढकाल र कुशल भुर्तेलले एक/एक विकेट लिए । 

त्यसअघि पहिले ब्याटिङ थालेको नेपालले निर्धारित २० ओभरमा ७ विकेट गुमाउँदै १४६ रन बनाएको थियो । नेपालका अनिल कुमार शाहले सर्वाधिक ४७ रन बनाए ।

कप्तान रोहित पौडेलले २३ ,सन्दीप जोराले २१ तथा गुल्शन झाले २० रन जोडे । कुशल मल्लले १२ रन बनाउँदा आशिफ शेखले ४ तथा कुशल भुर्तेलले १ रन जोडे । त्यहाँ नेपालले दुई ओटा अभ्यास खेल खेल्नेछ ।

विश्वकपअघि नेपाली टोलीले मे २७ मा क्यानडा र मे ३० मा आयोजक अमेरिकासँग खेल्ने छ । 

टी-२० विश्वकपमा नेपाल समूह 'डी' मा छ । समूहमा नेपालले दक्षिण अफ्रिका, श्रीलंका, बंगलादेश र नेदरल्यान्ड्ससँग प्रतिस्पर्धा गर्नेछ ।