हुन्डी र सुन तस्करीको रकम डिजिटल वालेटमा कारोबार, ​बाराबाट १ जना पक्राउ​

हुन्डी र सुन तस्करी कारोबारमा जोडिएका एक जनालाई प्रहरीले पक्राउ गरेको छ ।

पक्राउ पर्नेमा बाराको पशुपति ट्रेड कन्सर्नका मालिक अरुणकुमार यादव छन् । प्रहरीको केन्द्रीय अनुसन्धान ब्यूरोले यादवलाई बाराबाट नियन्त्रणमा लिएको हो ।

ब्यूरोका प्रमुख प्रहरी अतिरिक्त महानिरीक्षक श्यामलाल ज्ञवालीका अनुसार यादवले विगत एक वर्षको अवधिमा पेवेलबाट एक अर्ब १७ करोड र सजिलो पेबाट तीन करोड ३८ लाख रुपैयाँको कारोबार गरेको अनुसन्धानबाट खुलेको छ ।

उनी पेवेल र सजिलो पे भुक्तानीका बाराका एजेन्ट रहेको प्रहरी दाबी छ ।

ब्यूरोले पेवेल र सजिलो पे भुक्तानीका सञ्चालक र कर्मचारीसहित ६ जनालाई यसअघि नै पक्राउ गरिसकेको छ । उनीहरू ब्यूरोको हिरासतमा छन् ।

सुन र हुन्डी कारोबारमा डिजिटल माध्यमबाट एक खर्ब भन्दा बढी भुक्तानी गरेको आरोपमा पक्राउ परेकामथि ब्यूरोले राष्ट्र बैंकको सहयोगमा सूक्ष्म अनुसन्धान गरिरहेको जानकारी ज्ञवालीले दिए ।

२०८० असार २ मा राजस्व अनुसन्धान विभागको टोलीले ब्रेक प्याडमा लुकाइएको सुनको भाग छुट्याउँदा ६०.७१६ केजी सुन बरामद घटनाको विस्तृत अनुसन्धान गर्दा यी तथ्यहरू बाहिर आएका हुन् ।