पोखरा- पोखरा क्षेत्रीय अन्तर्राष्ट्रिय विमानस्थलको निर्माण कार्य तीव्र रूपमा अघि बढेको छ ।

राष्ट्रिय गौरवको आयोजनाका रूपमा रहेको यस विमानस्थलको निर्माण शुरू भएको करीब डेढ वर्षमा ३० प्रतिशतभन्दा धेरै काम भएको विमानस्थल निर्माण आयोजनाले जानकारी दिएको छ ।

तोकिएको अवधिभन्दा पहिले नै निर्माण सम्पन्न गर्ने गरी कामले गति लिएको आयोजना प्रमुख बिनेश मुनकर्मीले जानकारी दिए । सरकारकाले विमानस्थल उद्घाटन गरेदेखि नै तोकिएको अवधिभन्दा ६ महिना अगाडि नै तयार गर्न निर्माण कम्पनीलाई आग्रह गर्दै आएको छ ।

सरकारको आग्रहअनुसार नै विमानस्थल ६ महिनाअघि तयार गर्ने गरी द्रुत रूपमा काम अगाडि बढाइएको आयोजना प्रमुख मुनकर्मीले बताए । ‘सरकारकै अपेक्षा गरेअनुसार ६ महिनाअघि नै निर्माण सम्पन्न गर्ने गरी निर्माणको काम भइरहेको छ,’ उनले भने, ‘यसका लागि सहज वातावरण तयार भएको छ ।’ प्रमुख मुनकर्मीका अनुसार विमानस्थललाई तोकिएको समयभन्दा छिटो सम्पन्न गर्न ठेकेदार कम्पनी पनि तयार भएको छ । ‘निर्माणमा कुनै अवरोध र सामाग्री अभाव नभए तोकिएको समयभन्दा अगाडि नै निर्माण सम्पन्न गर्न ठेकेदार कम्पनी तयार भएको छ,’ उनले भने, ‘अहिलेसम्म हामीलाई कुनै अभाव र समस्या छैन । अब पनि त्यो अवस्था आउँदैन ।’

विमानस्थल निर्माण आयोजनाका अनुसार अहिले विमानस्थलको रनवेमा अन्तिम लेयर ढलान गर्ने काम धमाधम चलिरहेको छ । तीन तहको ढलान गर्नुपर्ने र तेस्रो चरणको ढलान पनि अन्तिम चरणमा पुगेको इन्जिनियर कृष्ण पौडेलले जानकारी दिए । उनका अनुसार अहिले साइड सम्याउने काम पनि त्यही ढंगले चलिरहेको छ । एप्रोन (विमान पार्किङ्ग गर्ने स्थान) निर्माणको काम सकिएको छ । विमानस्थलका रनवेको लेयर ढलान, रनवे, ट्याक्सी वे र नाला निर्माणलगायतका कामहरू यही चैत महिनाभित्र सम्पन्न हुनेछन् ।

विमानस्थलको भौतिक संरचना निर्माणको क्रममा टर्मिनल भवनको फाउन्डेसनको काम सकिएर जग उठाउने प्रक्रिया शुरू भएको छ । विमानस्थलमा क्षेत्रमा यतिबेला पहिलो चरणअन्तर्गतको विमानस्थलले ओगट्ने भू-भाग सम्याएर रनवे, ट्याक्सी वे, नाला निर्माणको काम अन्तिम चरणमा पुगेको छ ।

विमानस्थलमा हाल यात्रु कक्ष र कार्यालय प्रयोजनका लागि आवश्यक मुख्य भवनको फाउन्डेसनको कामसमेत तीव्र गतिमा अगाडि बढेको प्रमुख मनकर्मीले बताए । ‘विमानस्थलको भौतिक पूर्वाधारको काम तीव्र गतिमा अगाडि बढेको छ,' उनले भने, 'विमानस्थलको एप्रोन (विमान पार्किङ्ग गर्ने स्थान)को काम सकिएको छ। सम्याउने काम, ट्याक्सी वे, नाला बनाउने लगायतका काम अन्तिम चरणमा पुगिसकेको छ।’
रनवे, टर्मिनल बिल्डिङ, हेंगर बिल्डिङ, कार्गो, एटिसीलगायत अन्य सहायक गरी विभिन्न १४ भवन निर्माण कार्य भइरहेकोछ । ति मध्ये ४।५ वटा भवनको निर्माण समेत सम्पन्न भएको छ। हेंगरको ढलान कार्य सकिएर स्टिल स्ट्रक्चरको काम समेत सकिइसककेको उनले जानकारी दिए । 
आयोजना प्रमुख मुनकर्मीका अनुसार अहिले निर्माण कार्यमा दैनिक ४ सय ५० जना कामदार खटीएका छन् । हाल सम्म विमानस्थल आयोजनाले साढे तीन अर्ब रुपैयाँ भुक्तानी दिइसकेको उनले जानकारी दिए ।