सत्तारूढ दल नेपाल कम्युनिस्ट पार्टी (नेकपा)का नेता जनार्दन शर्माले आफूले सभामुखको दाबी नगरेको प्रष्ट पारेका छन् ।

सम्भावित सभामुखका रूपमा सञ्चारमाध्यमहरूमा उनको नाम आएपछि उनले सामाजिक सञ्जाल फेसबूकमा लेख्दै आफ्नो दाबी नरहेको बताएका हुन् ।

शुक्रवार साँझ फेसबूकमा लेख्दै शर्माले भनेका छन्, ‘सभामुखको विषयले संसद चल्न नसकिरहेको अवस्थामा छिटो टुङ्ग्याउनका लागि नेताहरूबीचमा सहजीकरणको भूमिकामा लागेको साँचो हो तर म आफै सभामुख हुनका लागि होइन र दाबी पनि छैन ।’

नेकपाका अध्यक्षद्वय पुष्पकमल दाहाल ‘प्रचण्ड’ र केपी शर्मा ओली दुवैले सभामुखमा आफूनिकट नेताहरू ल्याउन शक्तिसंघर्षमा उत्रिएका छन् । पुस ४ गतेदेखि बोलाइएको प्रतिनिधिसभा निरन्तर स्थगनको मारमा परेको छ ।