गरिब मन्त्री ज्वालाकुमारी साह !

सरकारले सार्वजनिक गरेको प्रधानमन्त्रीदेखि मन्त्रीको सम्पत्ति विवरण हेर्दा सबैभन्दा गरिब मन्त्रीको सूचीमा ज्वालाकुमारी साह परेकी छिन् ।

प्रधानमन्त्री तथा मन्त्रीपरिषद्ले सार्वजनिक गरेको विवरण अनुसार कृषि तथा पशुपंक्षी विकास मन्त्री साहको बारास्थित जीतपुर सिमरा उपमहानगरपालिका–१६ मा पुर्ख्यौली ५ कट्ठा जमिन छ ।

तर, त्यो जग्गा उनको श्रीमान् अमृत शर्मा बजगाईँको नाममा छ । साहकै नाममा भने सोही उपमहानगरपालिकामा १० धुर जमिन छ । त्यो पनि पुर्ख्यौली रहेको उनले सम्पत्ति विवरणमा उल्लेख गरेकी छिन् ।

साहको बाराकै कलैया उपमहानगरपालिका–४ मा १५ धुर जग्गा पुर्ख्यौली छ । 

साहको श्रीमान बजगाईँको नाममा सर्लाहीस्थित सविन मानपुर–२ मा ५ कट्ठा १९ धुर जमिन छ । तर उक्त जमिन ५० लाखमा पैतृक सम्पत्ति बिक्री गरेर खरिद गरेको सम्पत्ति विवरणमा उल्लेख छ। सुनचाँदीको विवरण हेर्दा साहसँग १० तोला सुन र २५ तोला चाँदी छ । त्यो पनि पुर्ख्यौली नै ।

बैंक तथा वित्तीय संस्थाको खाता र तिनमा भएका रकम विवरण हेर्दा सानिमा विकास बैंक कलैया शाखामा ३० हजार (तलबबाट) र उनको श्रीमान् बजगाईँको सोही बैंकमा १० हजार रकम जम्मा भएको देखिन्छ ।

अन्य विवरण हेर्दा चार कट्ठा जमिनमा बनेको अढाइ तले घर पुर्ख्यौलीबाट अंशबापत आएको साहले उल्लेख गरेकी छिन् ।