काठमाडौं – कामना न्युज पब्लिकेसनका प्रधान सम्पादक पुष्कारलाल श्रेष्ठ बिरामी परेका छन् । कामना न्युज पब्लिकेसनका प्रमुख कार्यकारी अधिकृत एवम् प्रबन्ध सम्पादक दिरेकलाल श्रेष्ठले बिहीवार विज्ञप्ति प्रकाशित गरी श्रेष्ठको ललितपुरको भैंसेपाटीस्थित नेपाल मेडिसिटी अस्पतालको सघन उपचार कक्षमा केही दिनदेखि उपचार हुँदै आएको जानकारी गराएका हुन् । 

करीब चार महिनाअघि नाकमा समस्या भएका कारण राजधानीको बयोधा अस्पतालमा नाकको र ब्लुक्रसमा मिर्गौलाको पत्थरीको शल्यक्रिया गरिएकोमा त्यस बेलासम्म उनको स्वास्थ्य स्थिति सामान्य रहे पनि मिर्गौलाको पत्थरीको शल्यक्रियापश्चात विभिन्न स्वास्थ्य समस्या देखा पर्दै गएको विज्ञप्तिमा उल्लेख छ ।

‘स्वास्थ स्थितिमा समस्या बढ्दै गएका कारण उहाँलाई थापाथलीस्थित नर्भिक इन्टरनेसनल अस्पतालमा उपचारार्थ भर्ना गरियो । नर्भिक अस्पतालमा केही दिनको उपचारका क्रममा चिकित्सकहरूले उहाँलाई गिलेन बारे सिन्ड्रोम भाइरसको संक्रमण भएको आशंका गरेका कारण थप उपचारका निम्ति नर्भिकले भारतको हरियाणास्थित मेदान्त अस्पताल रिफर गर्यो’ विज्ञप्तिमा भनिएको छ, ‘मेदान्त अस्पतालमा करिब दुई महिनासम्म उपचार गरेपछि उहाँलाई उक्त भाइरसको संक्रमणबाट मुक्त गराई काठमाडौं ल्याएको थियो । काठमाडौं ल्याएपछि केही समय नर्भिक अस्पतालमा नै राखेर औषधि उपचार गर्नुका साथै फिजियो थेपारीलगायतका विधिबाट उपचार गरिएको र स्वास्थ्य अवस्था सामान्य बन्दै गएको स्थितिमा घरमा नै राखेर फिजियो थेपारीलगायतका विधिबाट उपचार गर्न सकिने चिकित्सकको परामर्शअनुसार भैंसेपाटीस्थित निवासमा राखिएको थियो ।’ 

नियमित उपचार प्रक्रिया चल्दै गर्दा फेरि उनमा गम्भीर स्वास्थ्य समस्या देखा परेपछि आइतबारदेखि नेपाल मेडिसिटी अस्पताल पुर्‍याएर सघन उपचार कक्षमा उपचार हुँदै गरेको विज्ञप्तिमा उल्लेख छ । उनको स्वास्थ्य स्थिति जटिल र स्थिर अवस्थामा नै रहेको उपचारमा संलग्न चिकित्सकहरूले जनाएका छन् ।

‘चिकित्सकहरूले आफ्नो ज्ञान, विवेक र प्रविधिले भ्याएसम्म उहाँको उपचार गर्दै आउनुभएको छ । यसबीचमा उहाँको स्वास्थ स्थितिप्रति सञ्चारकर्मी, इष्टमित्र, आफन्त, राजनीतिक व्यक्तित्व, उद्योगी व्यवसायीलगायत सबै शुभेच्छुहरूले चासो राख्दै आउनुभएको छ, उहाँको स्वास्थ लाभको कामना गरिरहनुभएको छ । सबैको आर्शिवाद, शुभेच्छा र कामनाका कारण उहाँमा रोग प्रतिरोधात्मक क्षमता वृद्धि भई पुनः सक्रिय पत्रकारिता गर्न सक्षम हुनुहुनेछ भन्ने प्रार्थना गदर्छौं,’ श्रेष्ठले विज्ञप्तिमा भनेका छन् ।