बाढीपीडितको अनुरोध : कि खाना देऊ कि क्वारेन्टाइन पठाइदेऊ !

२०७१ सालमा बाढी आई घरबार बगाएका वीरेन्द्रनगरको महिला विकास केन्द्रमा बसेका बाढी पीडितहरुले सरकारसँग कि खाना दिने नभए लकडाउन नखुल्दासम्म क्वारेन्टाइनमा राखिदिन माग गरेका छन् ।

लकडाउन भएको ४६ औं दिन बित्दा पनि जम्मा दुईपटक प्रतिव्यक्ति पाँच किलोका दरले पाएको चामल सकिएको बताउँदै उनीहरूले सरकारमाथि आक्रोश पोखेका छन् ।

वैशाख २० गते नगरपालिकाले राहत दिन भनेर गरेको प्रतिबद्धता भूलेको उनीहरूको आरोप छ । ‘बाहिर जाँउ काम गर्न पाईदैन, घर भित्रै बसौं खानेकुरा केही छैन,’ बाढीपीडित रामकुमारी खत्रीले भनिन्, ‘यो बस्तीमा एक सय आठ जना बस्छौं । हामीलाई दिइएको चाम १९ वैशाखमै सकिएको हो । अब पसलमा जाँदा कोही पनि उधारो दिदैंनन् ।’

उनले थपिन् – ‘अब सरकारसँग हाम्रो एक माग पुर्याई दिनुस्, कि खाना देउ सरकार, नभए लकडाउनको अवधिसम्म हामीलाई परिवारसहित क्वारेन्टाइनमा लगेर राखिदेउ ।’

क्वारेन्टाइनमा राखिदिएको अवस्थामा आफ्ना छोराछोरीलाई खाना खुवाउन कुनै पनि समस्या नहुने उनको अपेक्षा छ ।

अर्का बाढीपीडित नरबहादुर रोकायाले नगरपालिकाले २० गते राहत दिने भनेको बताए । ‘हामीलाई २० गते राहत दिन्छौं भनेर भनेका थिए । हामी उक्त दिन नगरपालिकामा गएका थियौं । त्यसपछि त्यहाँबाट २५ गते आउन भनियो, २५ गते सबै जना राहत पाउने आशले गयौं तर खाली हात फर्कियौं,’ उनले गुनासो गरे ।

मैसरा गुरुङले आफूलाई वैशाख १० गते २० किलो चामल, दुई किलो दाल, दुई किलो चिउरा, एक किलो नुन र एक किलो तेल दिएको बताउँदै त्यही राहतले चार जना कतिञ्जेल खाने भन्दै प्रश्न गरिन । ‘एकातिर चामल सकिएको छ, अर्को तिर ग्यास सकिएको छ,’ उनले भनिन्, ‘दाउरा पाइँदैन खाना पकाउन, खानको लागि चामल छैन ।’

सरकारले कि लकडाउन खोलेर आफूहरुलाई काम गर्ने वातावरण बनाउनु पर्ने वा राहत दिनुपर्ने माग उनको छ ।

यता, वीरेन्द्रनगर नगरपालिकाका प्रमुख प्रशासकीय अधिकृत टिकाराम ढकालले अब हरेक दिन राहत मात्रै वितरण गर्न नसकिने बताए । ‘२३ गते सम्म फोन आएकाहरुलाई आज अन्तिम पटक राहत बाँडदैछौं । आजदेखि कसैलाई पनि राहत बाँडने पक्षमा हामी छैनौं । जिल्ला प्रशासन कार्यालयसँग आज बैठक बसेर भोली देखि नै उहाँहरुलाई सरकारी वा निजी परियोजनामा काम लगाउने तयारी गर्छौं,’ उनले भने ।

उनले थपे, ‘नभए उहाँहरु अल्छी हुने जोखिम छ । त्यो जोखिम न्यूनीकरण गर्न आउ काम गर र लैजाउ भन्ने नीति अख्तियार गरेर श्रममा लगाउँछौं । यसले हाम्रो काम पनि बन्ने छ भने अर्कोतिर उहाँहरुले आम्दानी पनि गर्नुहुनेछ ।’

नगरपालिकाले हालसम्म तीन करोड भन्दा बढीको राहत बाँडिसकेको बताउँदै उनले अब सबैलाई काममा लगाउनुपर्ने बताए ।

नगरपालिकाका कार्यवाहक प्रमुख मोहनमाया ढकालले २३ गतेदेखि नै राहत वितरण गर्ने काम बन्द गरिएको बताउँदै अब उनीहरूलाई काममा लगाउने गरी छलफल सुरु गरिएको बताइन । ‘सामाजिक दूरी कायम गरेर भएपनि उहाँहरुले गर्ने कामलाई निरन्तरता दिन हामी प्रमुख जिल्ला अधिकारी सँग आज छलफल गर्दैछौं,’ उनले भनिन्, ‘सरकारले नै गिटी बालुवाको काम खोल्ने, सामाजिक दूरी कायम गरेर निर्माणका कामहरु गर्ने निर्णय गरेको छ । सोही आधारमा हामी उहाँहरुलाई प्राथमिकता दिएर काम गराउँछौं ।’

उनले फोनका आधारमा मात्रै हालसम्म ४२ सय परिवारलाई राहत दिइसकिएको बताइन् ।