जापानको राजधानी टोक्योबाट लगभग ९४० किलोमिटर पर रहेको एउटा ज्वालामुखी आइतवार विस्फोट भएको छ । 

ज्वालामुखी विस्फोट भएपछि उत्तरपूर्वतिर लाभा तीव्र गतिमा बगिरहेको छ । आकाशमा १२ हजार ४६७ फीट माथिसम्म धूँवा उडेको छ । यो ज्वालामुखी विगत ६ देखि ७ वर्षमा ११ गुणा बढेको छ । 

ज्वालामुखीको नाम निशिनो–शीमा हो । यसबाट निस्केको लाभा तीव्र गतिमा बगिरहेको कुरा जापानको कोस्ट गार्डले पुष्टि गरेको छ । 

निशिमो–शीमा सन् २०१९ को डिसेम्बर ६ देखि सक्रिय छ । बिहीवार ठूलो विस्फोट भएदेखि लगातार विस्फोट भइरहेको छ । 

आजभन्दा ४६ वर्षअघि सन् १९७४ मा निशिमो–शीमा सानो टापु थियो । यसमा विगत १० हजार वर्षदेखि कुनै विस्फोट भएको थिएन । त्यतिखेर यो टापु ज्वालामुखीको माथिल्लो भाग थियो र त्यो समुद्र बाहिर देखिन्थ्यो ।

यस ज्वालामुखीले विगत सात वर्षयता धेरै लाभा बगाएकाले चारैतिर तीन वर्गकिलोमिटरको टापु बनेको छ । यो टापु लाभा जमेर बनेको पत्थरबाट निर्मित भएको हो । यसलाई निजिमा टापु वा रोजारियो टापु पनि भनिन्छ । अहिले यो वैज्ञानिकहरूका लागि अध्ययन केन्द्र बनेको छ । 

ज्वालामुखीको उचाइ बढेर ५२० फीट भएको छ । यसको आकार बढ्दै जाँदा अनि लगातार विस्फोट हुँदै जाँदा भूवैज्ञानिकहरू चिन्तित बनेका छन् ।